Zyrtarë të Manchester United raportohet se kanë zhvilluar një takim me sulmuesin e Real Madrid, Vinicius Junior, në Madrid, teksa klubi anglez po shqyrton seriozisht mundësinë për ta afruar brazilianin dhe për ta kthyer atë në “ikonën e re” të Old Trafford.

Vinicius ka qenë i lidhur së fundmi me një largim nga Santiago Bernabéu, mes raportimeve për tensione në rritje me trajnerin e ri të Real Madrid, Xabi Alonso. Përveç marrëdhënies së acaruara me teknikun spanjoll, një tjetër pengesë e madhe mbetet rinovimi i kontratës.

Sipas mediave spanjolle, ylli brazilian po kërkon një kontratë të re që ta vendosë në të njëjtin nivel page me Kylian Mbappé, kërkesë që drejtuesit e Real Madrid e konsiderojnë të padrejtë, duke marrë parasysh paraqitjet dhe statusin e francezit. Për këtë arsye, bisedimet për rinovim kanë ngecur.

Situata u tensionua edhe më shumë në tetor, gjatë El Clasicos ndaj Barcelonës, kur Vinicius reagoi ashpër pasi u zëvendësua nga Alonso. Edhe pse lojtari kërkoi falje më vonë, incidenti shtoi zërat se Real Madrid mund të mos e nisë sezonin e ardhshëm me të në skuadër.

Gazetari belg Sacha Tavolieri raportoi në nëntor se kishte pasur një “prishje totale” të bisedimeve për kontratën dhe se Real Madrid ishte i hapur për shitjen e lojtarit, duke vendosur një çmim fillestar prej 150 milionë eurosh.

Tani, sipas raportimeve nga Spanja, Vinicius ka zhvilluar një takim të fshehtë me përfaqësues të Manchester United, të cilët po përpiqen ta bindin që të transferohet në Premier League gjatë verës.

Me pesë gola dhe shtatë asistime në 23 paraqitje këtë sezon, e ardhmja e Vinicius Junior mbetet e paqartë, ndërsa Manchester United duket gati të bëjë një lëvizje të madhe për një nga yjet më të mëdhenj të futbollit botëror. /GazetaExpress