Vetëm pak orë para finales së madhe të Kupës së Botës për Klube, trajneri i Chelseat, Enzo Maresca, nuk i kurseu lavdërimet për Paris Saint-Germain dhe trajnerin e tyre, Luis Enrique, të cilin e përshkroi si njërin nga dy trajnerët më të mirë në botë, në të njëjtin nivel me Pep Guardiolën.
Në konferencën për shtyp para ndeshjes vendimtare të së dielës që do të luhet në MetLife Stadium në New Jersey, Maresca e pranoi hapur cilësinë e kundërshtarit:
“PSG është një skuadër e jashtëzakonshme dhe trajneri i tyre është më i miri, së bashku me Pepin,” deklaroi ai me bindje. Trajneri italian theksoi se skuadra pariziene ka treguar dominim të plotë si në Ligën e Kampionëve, ku mposhtën Interin 5-0, ashtu edhe në këtë turne.
Megjithatë, pavarësisht respektit për kundërshtarin, Maresca theksoi se Chelsea nuk do të ndryshojë stilin e lojës:
“Na pëlqen të kemi topin në zotërim, dhe edhe atyre po ashtu. Ata ushtrojnë presion lart, ashtu si ne. Besoj se do të jetë një ndeshje me sulme të vazhdueshme nga të dyja palët.”
Ai shtoi se e ka studiuar PSG-në në detaje për të identifikuar pikat e dobëta.
Chelsea mbylli një sezon të suksesshëm, duke përfunduar në vendin e katërt në Premier League dhe duke fituar Conference League, pas fitores ndaj Real Betis.
Ky sukses i dha atyre të drejtën të marrin pjesë në këtë format të ri të Kupës së Botës për Klube, me 32 ekipe dhe me ndeshje të zhvilluara në Shtetet e Bashkuara.
“Arritja më e madhe është se para një viti njerëzit flisnin më shumë për paratë sesa për futbollin kur përmendej Chelsea. Tani flasin për futbollin tonë,” u shpreh Maresca me krenari për transformimin që ka sjellë në klub.
Ai shtoi gjithashtu se dhoma e zhveshjes është “e lumtur dhe shumë krenare” për atë që kanë arritur:
“Nisëm me 32 skuadra dhe tani kanë mbetur vetëm dy. Është një privilegj të jemi këtu.”
Të dielën në orën 21:00 me kohën evropiane, Chelsea dhe PSG do të përballen për titullin e Kupës së Botës për Klube.
Pritet një përballje taktike mes dy skuadrave me stile të ngjashme, dhe një tjetër mundësi për të parë në veprim Luis Enriquen, i cili gjithnjë e më shumë po konsiderohet si një nga trajnerët më elitarë në botë.
“Do të jetë si një lojë shahu… por duam edhe ta shijojmë,” përfundoi Maresca./GazetaExpress/
