Manchester United u ndal në një barazim zhgënjyes 1:1 ndaj Wolverhampton mbrëmë në “Old Trafford”, një rezultat që ka lënë pakënaqësi të madhe te lojtarët dhe tifozët.

Më i zëshmi pas ndeshjes ishte mbrojtësi argjentinas Lisandro Martinez, i cili nuk e fshehu aspak frustrimin e tij.

“Jam vërtet i zhgënjyer. Nuk mund ta bëjmë këtë në shtëpi,” deklaroi Martinez, duke theksuar se paraqitje të tilla nuk janë të pranueshme për një klub me ambiciet e Manchester United.

Sipas tij, presioni dhe dominimi në “Old Trafford” duhet të jenë standard. “Ne supozohet të fitojmë në shtëpi dhe kundërshtarët duhet të vuajnë,” shtoi ai, duke nënvizuar mentalitetin që, sipas tij, duhet të ketë skuadra në çdo ndeshje para publikut të vet.

Barazimi ndaj Wolves shihet si një hap prapa për United, që po synon konsistencë dhe rikthim në rezultatet pozitive.