Aventura e Kylian Mbappé si pronar i Stade Malherbe Caen po kalon një nga momentet më të vështira.
Që nga blerja e klubit në verën e vitit 2024, rezultatet kanë qenë nën pritshmëritë. Pas rënies në kategorinë e tretë të Francës, Caen po përballet tani me probleme serioze financiare që tashmë kanë çuar në shkurtim të stafit.
Në mes të kësaj krize, reperi Orelsan – një nga tifozët më të njohur të klubit – ka sulmuar kapitenin e Kombëtares së Francës në këngën e tij të re “La Petite Voix”.
Në një varg ai thotë: “Do ta fundosësh qytetin tënd si Mbappé,” një frazë që nuk kaloi pa u vënë re nga ylli i Real Madridit.
Besnik ndaj stilit të tij të drejtpërdrejtë, Mbappé nuk vonoi të përgjigjej. Në llogarinë e tij në X (Twitter), ai reagoi me ironi: “Je i ftuar të ‘shpëtosh’ qytetin që e do aq shumë, Orelsan. P.S.: Ky tipi na lutej ta lejonim të merrte 1% pa paguar, sepse është i falimentuar - por donte të dukej si djali i artë i Normandisë”.
Postimi u bë menjëherë viral, duke shkaktuar mijëra reagime dhe debate mes tifozëve të habitur nga përplasja publike midis dy figurave të mëdha franceze.
Për disa, Mbappé e kaloi kufirin; për të tjerët, ai thjesht po mbronte projektin e tij nga një sulm i padrejtë.
Kur Mbappé bleu Caenin, ai u bë aksionari kryesor më i ri në historinë e futbollit francez - një veprim që shumë e panë si shenjë besnikërie ndaj rrënjëve të tij.
Por ekipi drejtues që ai emëroi është përballur me gjithnjë e më shumë kritika, dhe klubi - dikur një emër i njohur në Ligue 1 - tani renditet i dhjeti në “National”, kategorinë e tretë franceze.
Ëndrra për ta rikthyer Caenin në elitën e futbollit francez mbetet gjallë, por kjo përplasje me Orelsan e ka bërë të qartë një gjë: projekti jashtë fushe i Mbappé po përjeton kapitullin e tij më të trazuar./GazetaExpress/
