Mbështetja e Britanisë për veprimin ushtarak të SHBA-së kundër Iranit erdhi “shumë pak dhe shumë vonë”, por marrëdhënia e Keir Starmer me Donald Trump mund të riparohet, sipas njërit prej bashkëpunëtorëve më të afërt të presidentit amerikan, Steve Witkoff.

Komentet e Witkoff, i cili ka shërbyer si i dërguari special i Trumpit për Lindjen e Mesme, vijnë pas një serie kritikash publike nga lideri amerikan ndaj kryeministrit britanik dhe qëndrimit të Mbretërisë së Bashkuar për sulmet amerikane dhe izraelite ndaj Iranit, shkruan The Guardian, transmeton Gazeta Express.

Starmer u përpoq të riparonte marrëdhëniet e tensionuara të dielën në një telefonatë me Trumpin, pasi ky i fundit kishte deklaruar në rrjetet sociale: “Nuk kemi nevojë për njerëz që i bashkohen luftërave pasi ne tashmë i kemi fituar”.

Ky koment erdhi disa ditë pasi Trump ishte ankuar se Starmer “u vonua shumë” për të lejuar forcat amerikane të përdornin bazat ajrore britanike dhe më vonë komentoi me përçmim për të para gazetarëve:

“Ky nuk është Winston Churchill me të cilin kemi të bëjmë”.

Megjithatë, Witkoff tha në një intervistë për GB News:

“Ai ka thënë, siç e dini, se kjo bie pak në kategorinë ‘shumë pak dhe shumë vonë’, por mendoj se ata kanë një marrëdhënie të mirë dhe solide dhe shpresojmë se do të mund ta riparojnë. Unë mbështetem në atë që thotë Presidenti, dhe Presidenti thotë vazhdimisht se të gjithë kanë të drejtë për pikëpamjen e tyre. Por mendoj se ndonjëherë ne ndiejmë se mungon një ndjenjë mirënjohjeje”.

“Mendoj se qëndrimi i Presidentit është se ne bëjmë shumë për Europën, shumë për Mbretërinë e Bashkuar – në fushën e tregtisë, të mbrojtjes dhe në mbështetjen që i japim NATO-s. Dhe mendoj se ndonjëherë përgjigjja, reciprociteti nga ana tjetër, është paksa i pamjaftueshëm. Do ta lija me kaq”, tha ai.