Brenda një jave, në Prishtinë u shqiptuan 5398 masa administrative me gjobë për lloje të ndryshme të kundërvajtjeve dhe shkeljeve të kodit rrugor, derisa 753 prej tyre u evidentun nga vetura inteligjente dhe vetura me radar mobil.

Kështu u bë e ditur përmes një njoftimi të Policisë rajonale të Prishtinës, ku ndër të tjera, theksohet se gjatë javës së kaluar në lokacione të ndryshme dhe aksione të ndara, janë realizuar  141 urdhëresa të gjykatës, prej tyre 38 urdhëresa për vepra penale, ndërsa të tjerat për kundërvajtje, seanca, verifikime.

Në përputhje me urdhëresat, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa.

Aktivitetet policore janë shtrirë  edhe në segmente të tjera të sigurisë.

Kësisoj në harkun e njëjtë kohor janë sekuestruar nëntë armë zjarri, të llojeve dhe kalibrave të ndryshëm, si dhe municione të llojeve dhe kalibrave të ndryshëm.