Këshilli Prokurorial i Kosovës (KPK) ka thirrur mbledhje të jashtëzakonshme, në të cilën pritet që të zgjidhet kryesuesi i ri i tij. 

Kandidaturat për pozitën më të lartë në sistemin prokurorial i kanë paraqitur prokurori i Prokurorisë së

Apelit, Arian Gashi dhe prokurori i Prokurorisë Speciale, Milot Krasniqi.

Zgjedhja e tyre pritet që të bëhet nëpërmjet votimit të fshehtë. 

Të dy anëtarët e kanë marrë mandatin para se të hynin në fuqi ndryshimet në Ligjin për KPK-në. 
Prokurori Krasniqi është doktor i shkencave juridike në fushën e ndërmjetësimit në çështje penale dhe ka qenë student i dalluar gjatë studimeve në Universitetin e Prishtinës (UP). Ai ka qenë zyrtar në Ministrinë e Kulturës, në Anti-Korrupsion, e ka ushtruar pozitën e prokurorit në Prokurorinë e Prizrenit, ndërsa si prokuror special ka marrë pjesë në ekipe të përbashkëta hetimore me Shtetet e Bashkuara (SHBA), përderisa vazhdon që ta përfaqësojë Prokurorinë e Shtetit ndërkombëtarisht, në organizime si programet e “EuroJustit”.

Krasniqi, bashkë me zëvendëskryeprokurorin e Prokurorisë Speciale, Valdet Gashi, janë autorë të aktakuzës në rastin për rezervat shtetërore. 

Për nga rreshtimi në konfliktet e fundit përbrenda KPK-së, të cilat janë shpërfaqur gjatë vitit të shkuar si dhe në fillim të këtij viti, Milot Krasniqi ka qenë pro shkarkimit të Besim Kelmendit nga detyra e Kryeprokurorit të Shtetit, si dhe kundër certifikimit të Elza Bajrami-Kastratit si anëtare në KPK, deri kur Gjykata Supreme vendosi ta certifikonte atë. 

Krejt të kundërt e ka pasur orientimin prokurori Arian Gashi, i cili më shumë sesa për aktakuzat e ngritura në cilësinë e prokurorit, njihet për fjalinë: “Pesë minus pesë bëjnë zero”, të cilën e ka thënë kur e ka kundërshtuar refuzimin e kundërligjshëm të raportit për certifikimin e Elza Bajrami-Kastratit, e cila në fund e ka fituar betejën në gjyq. 

Edhe Gashi ka ngritur disa aktakuza kundër rasteve të korrupsionit, në cilësinë e prokurorit në Prokurorinë Themelore në Prishtinë. Ai është kryetar i Komisionit për Çështje Normative, kryesues i Komisionit të KPK-së për Mbikëqyrjen e Lëndëve të Korrupsionit dhe Krimeve Ekonomike, si dhe anëtar i Komisionit për Transferim dhe Avancim. Ka qenë edhe anëtar i grupeve punuese për ndryshime në Kodin Penal dhe në Kodin e Procedurës Penale. 

Gashi po ashtu u ka mbajtur trajnime prokurorëve për përpilim të aktakuzave, ndërkaq ligjëron edhe për tema të ndryshme, si “Uzurpimi i paligjshëm i pronës dhe kthimi i sendeve” në Akademinë e Drejtësisë. /Koha