Mbreti Charles III i Mbretërisë së Bashkuar ka bërë ndërhyrjen e tij të parë në raundin e fundit të zbulimeve në skandalin e Jeffrey Epstein, duke deklaruar se Buckingham Palace është gati të mbështesë policinë ndërsa ajo shqyrton akuzat kundër vëllait të tij, Andreë Mountbatten-Windsor.
“Mbreti e ka bërë të qartë me fjalë dhe përmes veprimeve të paprecedenta, shqetësimi i tij i thellë për akuzat që vazhdojnë të dalin në dritë lidhur me sjelljen e z. Mountbatten-Windsor,” tha një zëdhënës i Pallatit.
“Ndërsa pretendimet specifike në fjalë i takojnë z. Mountbatten-Windsor t’i adresojë, nëse bëhet fjalë për Thames Valley Police, ne jemi gati t’i mbështesim siç do të pritej,” shtoi ai.
Policia e Thames Valley konfirmoi se po vlerëson nëse ka bazë për të hapur hetim pas një ankese nga grupi anti-monarkist Republic, i cili e ka raportuar Mountbatten-Windsor për dyshime për shpërdorim detyre dhe shkelje të sekretit zyrtar.
Email-et nga dokumentet e publikuara së fundmi të çështjes Epstein duket se tregojnë se ish-princi ka përcjellë raporte nga vizitat në Singapor, Hong Kong dhe Vietnam, si dhe detaje konfidenciale për mundësi investimi.
Pas këtyre udhëtimeve, më 30 nëntor 2010, ai duket se ka përcjellë raporte zyrtare mbi vizitat — të dërguara nga këshilltari i tij i atëhershëm special, Amit Patel — te Epstein, vetëm pesë minuta pasi i kishte marrë.
Gjithashtu, detaje për mundësi investimi në Afganistan, të përshkruara si “konfidenciale”, duket se i janë përcjellë Epstein-it më 24 dhjetor 2010.
Sipas udhëzimeve zyrtare, të dërguarit tregtarë kanë detyrimin të ruajnë konfidencialitetin mbi informacione të ndjeshme, komerciale ose politike që lidhen me vizitat e tyre zyrtare.
Deklarata e Pallatit Buckingham thekson se mendimet dhe simpatia e Mbretit dhe Mbretëreshës “kanë qenë dhe mbeten me viktimat e çdo dhe të gjitha formave të abuzimit”.
Më herët të hënën, Mbreti kishte udhëtuar në Clitheroe, ku një person nga turma bërtiti: “Prej sa kohësh keni ditur për Andrew?”. Pjesa tjetër e turmës e kundërshtoi me fishkëllima personin që bëri pyetjen.
Ndërhyrja e Pallatit Buckingham vjen pas një deklarate të mëhershme nga zëdhënësi i Princit dhe Princeshës së Uellsit, të cilët thanë se ishin “thellësisht të shqetësuar” nga zbulimet e fundit lidhur me Epstein-in.
