Mbrojtësi rus i Rubin Kazanit, Ilya Rozhkov ka thënë fjalët më të mirë për Mirlind Dakun, madje duke thënë se një sulmues si ai mund të luajë edhe në Barcelonë.

Gjatë ditës së premte, mbrojtësi rus ka dhënë një intervistë për “legalbet.ru”, ku edhe e ka përmendur disa herë Dakun.

“Nëse Daku do të transferohej te Barcelona për ta zëvendësuar Robert Leëandoëskin, ai nuk do të ishte i humbur aspak! Mirlindi është futbollist që mund të përshtatet në çdo ligë, në Spanjë, Gjermani, Itali. Është lojtar i nivelit shumë të lartë. Mendoj se ai mund t’ia dalë në Evropë”, ka deklaruar Rozhkov. 

Ai është shprehur i lumtur që sulmuesi shqiptar nuk u largua nga Rusia, edhe pse pati interesim të madh për Dakun.

Rozhkov thotë se Daku është njëri prej lojtarëve më të mirë në ligën elitare ruse.

Daku është pjesë e Rubin Kazanit që prej vitit 2023.

Në edicionin e tanishëm ai ka luajtur në 11 ndeshje në të gjitha garat, ndërsa ka kontribuuar me tetë gola e një asistim. 

27-vjeçari ka kontratë me klubin rus deri në vitin 2029./GazetaExpress/