Mbrojtja e ish-krerëve të Ushtrisë Çlirimtare të Kosovës nisi deklaratën përmbyllëse në gjykimin në Gjykatën Speciale në Hagë.

I pari për deklaratën u ngrit Luka Misetic, avokati i Hashim Thaçit.

Fillimisht, ai tha se "Hashim Thaçi është i pafajshëm".

Në dy ditët paraprake, prokurorë të Prokurorisë së Specializuar thanë deklaratën përmbyllëse të organit të akuzës.

Deklaratën përmbyllëse e dha dje edhe Mbrojtësi i Viktimave.

Nga sot, avokatët e Hashim Thaçit, Kadri Veselit, Rexhep Selimit dhe Jakup Krasniqit do t'i japin deklaratat e tyre përmbyllëse.

Prokuroria e Specializuar ka kërkuar 45 vjet burgim për secilin prej ish-krerëve të UÇK-së.

Pasi të jepen të gjitha deklaratat përmbyllëse, që parashihet të kryhen deri më 18 shkurt, çështja do t’i kalojë trupit gjykues, që ka tre muaj kohë për shpalljen e një aktgjykimi.

Thaçi, Veseli, Selimi e Krasniqi po qëndrojnë në paraburgimin e Gjykatës Speciale në Hagë prej fillimit të nëntorit të vitit 2020, të akuzuar për krime lufte dhe krime kundër njerëzimit. Prokuroria e Specializuar i akuzon ata se kanë qenë ose duhej të ishin në dijeni të këtyre krimeve.