Scott McTominay ka një klauzolë në kontratën e tij me Napolin, mes spekulimeve se ai mund të largohet nga kampionët e Serie A.

Reprezentuesi skocez i dha fund qëndrimit të tij të gjatë te Manchester Unitedi në vitin 2024 dhe u transferua në Itali, pavarësisht se trajneri i atëhershëm Erik ten Hag ishte kundër shitjes së tij.

I blerë për vetëm 25.4 milionë paund, McTominay ka qenë një zbulim i madh në Napoli, duke i ndihmuar drejt titullit historik të tretë “Scudetto”, me 12 gola në kampionat nga mesfusha dhe duke fituar çmimin e lojtarit të vitit në ligë.

I adhuruar nga tifozët, ai ka kontratë deri në vitin 2028.

Megjithatë, gazetari i transferimeve Nicolo Schira ka raportuar se klube nga Premierliga dhe Arabia Saudite kanë bërë oferta për të.

Ka pasur gjithashtu raportime që e lidhin me një rikthim në “Old Trafford”, me “Tuttomercatoweb” që pretendon se Unitedi “po udhëheq garën” për ta rikthyer.

Megjithatë, nëse McTominay transferohet sërish, Manchester Unitedi do të përfitojë financiarisht.

Kur e shiti mesfushorin, klubi anglez përfshiu një klauzolë prej 10% nga shitja e ardhshme, duke siguruar një pjesë të çdo tarife të re transferimi.

Duke marrë parasysh sezonin e tij të jashtëzakonshëm me gola, është e pritshme që vlera e tij në treg të jetë dukshëm më e lartë se ajo me të cilën u largua drejt Napolit.

Sipas “Manchester Evening News”, Napoli po punon për një kontratë të përmirësuar për McTominayn, që do të përfshinte një rritje të konsiderueshme page dhe një zgjatje të mundshme deri në vitin 2030.

Vetë lojtari ka folur për spekulimet, duke theksuar dëshirën për të qëndruar gjatë te Napoli dhe duke deklaruar se është “jashtëzakonisht i lumtur këtu”.

“Agjenti im nuk ka komunikuar me askënd për të ardhmen time,” tha McTominay për “Corriere dello Sport”.

“Ai flet vetëm me mua dhe me klubin. Nuk ka thënë asgjë për gazetat. Jam jashtëzakonisht i lumtur këtu dhe, sa më përket mua, jam lojtar i Napolit; kjo është e vetmja gjë për të cilën mendoj. E ardhmja është shumë e rëndësishme dhe mund ta shoh veten te Napoli për një kohë të gjatë. E dua këtë vend. Vështirësitë kanë qenë minimale, familja ime është e lumtur dhe unë jam i lumtur”, ka shtuar ai.

Këtë sezon, Napoli renditet i treti, 14 pikë pas kryesuesve Interit, pas humbjes 2-1 në transfertë ndaj Atalantas.

McTominay ka pasur probleme me një tendinë që kërkon menaxhim të kujdesshëm, ndërsa mungesa e tij është ndjerë shumë, pasi Napoli nuk ka fituar asnjë ndeshje pa të në formacion.

Napoli rikthehet në fushë të shtunën e ardhshme, kur udhëton për t’u përballur me Hellas Veronan./GazetaExpress/