Liria e medias në Serbi po përkeqësohet vazhdimisht, në një kohë kur vendi po përballet me protesta studentore kundër korrupsionit dhe prirjeve gjithnjë e më autoritare të presidentit Aleksandar Vuçiq. Kështu shkruan mediumi publik zviceran RTS, duke theksuar se prej më shumë se një viti gazetarët dhe mediat e pavarura janë nën sulme të shtuara, presion politik dhe ekonomik.
Sipas raportimit, mbulimi i protestave kundër korrupsionit është kthyer në një aktivitet me rrezik të lartë për gazetarët në Serbi. Ata sulmohen rregullisht, si në terren ashtu edhe përmes presioneve të tjera. Mes tyre është edhe Ksenija Pavkov, gazetare e televizionit N1, një media që aktualisht ndodhet nën vëzhgim të vazhdueshëm nga autoritetet, transmeton albinfo.ch.
"Shpesh ndodh që huliganë pro-regjimit të na gjuajnë me gurë, shishe apo objekte të tjera, ndërsa policia nuk reagon për të na mbrojtur,” ka deklaruar ajo në një intervistë për emisionin e mëngjesit të RTS-së. “Përveç kësaj, përballemi vazhdimisht me fyerje, kërcënime dhe madje edhe kërcënime me vdekje.”
Gazetarët etiketohen si “terroristë”
Presidenti Aleksandar Vuçiq, sipas RTS-së, i cilëson shpesh gazetarët kritikë si “mercenarë” apo “terroristë”, duke krijuar një klimë armiqësore ndaj medias së pavarur. Kjo situatë është veçanërisht e rëndë në qytetet jashtë kryeqytetit.
“Gazetarët që nuk e mbështesin regjimin baltosen sistematikisht nga tabloidët pro-qeveritarë,” thotë Zoran Kneževiç, kryeredaktor i Radio 021 në Novi Sad. “Këto media publikojnë detaje nga jeta private e tyre dhe fabrikojnë vazhdimisht gënjeshtra.”
“Mungesë e plotë transparence”
Sipas Milica Šariç, drejtoreshë e Qendrës për Gazetari Investigative në Serbi, hetimi i sistemit klientelist që protestuesit denoncojnë prej më shumë se një viti është bërë pothuajse i pamundur, përcjell albinfo.ch.
“Nuk ka qenë kurrë kaq e vështirë të bësh gazetari investigative,” shprehet ajo. “Autoritetet refuzojnë të na japin qasje në dokumente publike. Gjithçka është e mbuluar nga mungesa e transparencës dhe sekretit.”
Organizata ndërkombëtare Reporterët pa Kufij e ka cilësuar tashmë Serbinë si “hallkën më të dobët në Evropë” sa i përket lirisë së medias.
