Liderë të krahut të djathtë nga e gjithë bota janë bashkuar për të shprehur mbështetje për Viktor Orbánin e Hungarisë, duke nënvizuar simbolikën që zgjedhjet në këtë vend kanë për lëvizjet e ekstremit të djathtë në nivel global, edhe pse udhëheqësi populist po mbetet prapa në sondazhe.

Një video e fushatës e publikuar online nga Orbáni këtë javë përfshin mbështetje nga gati një duzinë liderësh, përfshirë Giorgia Melonin dhe Matteo Salvinin nga Italia, Marine Le Pen nga Franca dhe Alice Weidel nga Gjermania.

"Europa ka nevojë për Viktor Orbán”, thotë Weidel, një bashkëkryetare e Alternativës për Gjermaninë (AfD) të ekstremit të djathtë.

Le Pen, ish-udhëheqësja e partisë franceze të ekstremit të djathtë National Rally, e mbulon me lavdërime liderin që dikur e përshkroi Hungarinë si një “enë Petri për iliberalizmin”.

“Falë liderëve si Viktor Orbán, kampi i patriotëve dhe mbrojtësve të kombeve dhe të popujve sovranë po arrin gjithnjë e më shumë sukses në Europë”, thotë ajo.

Meloni, nga ana tjetër, kërkon të nxjerrë në pah ngjashmëritë që ndan me Orbán: “Së bashku ne mbështesim një Europë që respekton sovranitetin kombëtar [dhe] është krenare për rrënjët e saj kulturore dhe fetare”.

Shfaqja e mbështetjes para zgjedhjeve në Hungari më 12 prill vjen pas një viti në të cilin Orbán, lideri më i gjatë në detyrë në Bashkimin Europian, ishte në qendër të vëmendjes për shkak të përpjekjes së qeverisë së tij për të ndaluar ngjarjet Pride [Manifestime për të drejtat LGBTQ+] dhe për të ashpërsuar kontrollin mbi mediat e pavarura dhe OJQ-të.

Orbán, i cili është përballur prej kohësh me kritika për dobësimin e institucioneve demokratike, gërryerjen e lirisë së medias dhe minimin e sundimit të ligjit, po përballet me një sfidë të paparë nga një ish-anëtar i lartë i partisë së tij, Péter Magyar.

Ndërsa hungarezët përballen me rënie ekonomike, rritjen e kostos së jetesës dhe dobësimin e shërbimeve sociale, sondazhet kanë sugjeruar se Orbán dhe partia e tij Fidesz po mbeten pas partisë opozitare Tisza të Hungarisë.

Në përgjigje, Fidesz është përpjekur të theksojë lidhjet ndërkombëtare të Orbán-it, duke i paraqitur ato si një aset për Hungarinë në mes të kushteve ndërkombëtare të paqëndrueshme dhe të trazuara, sipas Márton Bene, një analist politik në Institutin TK për Shkenca Politike në Budapest.

"Diçka që kundërshtari i tij - si një i sapoardhur në politikë - thjesht nuk e ka", tha ai.

Fushata e Magyarit, përkundrazi, është fokusuar te çështjet e brendshme, me premtime për të stimuluar ekonominë hungareze duke luftuar korrupsionin dhe duke liruar miliarda euro nga fondet e ngrira të BE-së.

Liderë të tjerë që shfaqen në video përfshijnë Herbert Kickl, udhëheqësin e Partisë së Lirisë të Austrisë (FPÖ); kryeministrin çek, Andrej Babiš; si dhe presidentët e Serbisë dhe Argjentinës, Aleksandar Vuçiq dhe Javier Milei.

Kryeministri i Izraelit, Benjamin Netanyahu, gjithashtu shfaqet, duke thënë se “siguria nuk mund të merret si e mirëqenë, ajo duhet fituar” dhe duke përshkruar Orbánin si dikë që ka cilësitë e nevojshme për të mbrojtur vendin e tij.

Netanyahu u shfaq në këtë video pavarësisht bojkotit zyrtar të Izraelit ndaj dy partive të ekstremit të djathtë që janë në këtë video,  AfD-së së Gjermanisë dhe FPÖ-së së Austrisë, për shkak të rrënjëve të tyre antisemitike, thotë gazeta izraelite Haaretz.