Ka qenë një mëngjes i ngarkuar për drejtorin e Milanit, Igli Tare, i cili është takuar me Massimiliano Allegrin dhe agjentët e Conrad Harder në selinë e klubit, sipas “Sky Sport”.

Humbja befasuese 2-1 e Milanit kundër Cremoneses në ndeshjen e parë të Serie A për sezonin 2025-26 u pasua nga një takim mes Allegrit dhe Tares në “Casa Milan” të dielën në mëngjes.

Sky Sport Italia raporton se tekniku italian mbërriti në selinë e klubit pak pas mesditës me orën lokale për të diskutuar lëvizjet e ardhshme në merkato.

Gjigantët e Serie A mbeten të interesuar për një qendërsulmues, por e kanë dërguar përsëri në Gjermani Victor Boniface, pasi testet mjekësore të kryera nga nigeriani ngritën dyshime për gjendjen e tij fizike.

Kjo nuk do të thotë se marrëveshja ka dështuar, por Milani po merr kohë para se të marrë një vendim përfundimtar.

Nuk është rastësi që Tare gjithashtu është takuar këtë mëngjes në Casa Milan me agjentët e sulmuesit të Sporting CP, Harder.

Bisedimet mes drejtorit të kuqezinjve dhe përfaqësuesve të ndërkombëtarit danez janë ende në vazhdim.

Sipas “Gazzetta”, Milani mund të nënshkruajë si me Boniface ashtu edhe me Harder, ose me një tjetër qendërsulmues, në ditët e fundit të merkatos së verës./GazetaExpress/