Një takim i rëndësishëm merkatoje është zhvilluar në Continassa, ku drejtuesit e Juventusit janë mbledhur për të analizuar nevojat e skuadrës. Në takim ishin të pranishëm CEO Damien Comolli dhe drejtori i ri sportiv Marco Ottolini, të cilët dëgjuan kërkesat e trajnerit Luciano Spalletti pas fitores ndaj Sassuolos dhe para ndeshjes së radhës me Cremonesen.

Nga diskutimet ka dalë qartë se Juve do të ndërhyjë në merkato vetëm për lojtarë që rrisin realisht nivelin e ekipit. Prioritetet e Spallettit janë një zëvendësues për Yildiz dhe një mesfushor i gjithanshëm, i aftë të luajë në disa role – një profil i ngjashëm me Weston McKennie.

Për sulmuesin qendror, klubi preferon të presë zhvillimet mbi gjendjen e Dusan Vlahovic, ndërsa emri i Lorenzo Luccas vazhdon të qarkullojë.

Në orët e fundit ka marrë hov një ide e re: shkëmbim mes Juventusit dhe Milanit, me Ruben Loftus-Cheek që do të kalonte te bardhezinjtë dhe Federico Gatti te kuqezinjtë. Marrëveshja po shqyrtohet si huazim i dyanshëm deri në fund të sezonit dhe po vlerësohet nga të dy klubet, lojtarët dhe trajnerët.

Spalletti është një admirues i vjetër i Loftus-Cheek dhe e sheh anglezin si një element ideal për skemën e tij, falë forcës fizike dhe fleksibilitetit taktik. Mesfushori i Milanit kërkon më shumë minuta, me synimin për të bindur Tuchelin për Kupën e Botës, dhe te Juve do të kishte më shumë hapësira për t’u shprehur.

Nga ana tjetër, Federico Gatti po e sheh me interes Milanin. Mbrojtësi, që po rikthehet nga dëmtimi, nuk është më qendror në planet e Spallettit, ndërsa Max Allegri do ta priste me krahë hapur për të përforcuar repartin defensiv të kuqezinjve. Edhe Gatti ka objektiv Botërorin dhe ka nevojë për vazhdimësi.

Topi tani është në fushën e drejtuesve Marco Ottolini dhe Igli Tare, të cilët do të vendosin nëse kjo lëvizje e dyfishtë do të konkretizohet në ditët në vijim. /GazetaExpress