Beteja ligjore që mbajti në tension futbollin europian ka marrë fund.

Paris Saint-Germain ka vendosur të mos apelojë vendimin e gjykatës së punës, duke rënë dakord të paguajë mbi 60 milionë euro ndaj ish-yllit të tij, Kylian Mbappé.

Me këtë hap, klubi parizien mbyll përfundimisht një nga sagat më të profilit të lartë dhe më të tensionuara të viteve të fundit.

Avokati i klubit, z. Semerdjian, konfirmoi se PSG ka respektuar plotësisht vendimin e gjykatës.

“Ndryshe nga pretendimet e rreme të lojtarit dhe rrethit të tij, klubi ka përmbushur të gjitha detyrimet, si në publikimin e vendimit ashtu edhe në pagesën e plotë të shumave të detyruara,” deklaroi ai.

Ekipi ligjor i PSG-së theksoi se vendimi nuk u kundërshtua asnjëherë dhe hodhi poshtë zërat për vonesa të qëllimshme.

Pas muajsh shkëmbimesh dhe procedurash ligjore, si institucioni ashtu edhe kapiteni i kombëtares franceze mund ta konsiderojnë çështjen të mbyllur.

Mosmarrëveshja kishte të bënte me bonuse dhe paga të papaguara.

Tani, PSG synon të stabilizojë projektin sportiv pa hije ligjore, ndërsa Mbappé mbyll kapitullin administrativ në Paris për t’u fokusuar plotësisht në të tashmen e tij profesionale./GazetaExpress/