Situata e portierit të ri çek Antonín Kinský te Tottenham Hotspur është kthyer në një çështje të nxehtë në Angli.

Pas gabimeve të tij në ndeshjen e Champions League kundër Atlético Madridit, e ardhmja e tij në Londër duket gjithnjë e më e pasigurt.

Portieri 22-vjeçar e përjetoi një mbrëmje shumë të vështirë në Madrid, ku u zëvendësua vetëm pas 17 minutash lojë pasi skuadra e tij i kishte pësuar tre gola në çerekun e parë të ndeshjes.

Vendimi i trajnerit Igor Tudor për ta larguar kaq herët nga fusha shkaktoi polemika të shumta, edhe për mënyrën se si u menaxhua situata.

Sipas mediave angleze, Kinský mund të kërkojë huazim ose transferim gjatë verës për të gjetur më shumë hapësira, përcjell “Gazeta Express”.

Klubi londinez e kishte bllokuar një largim të tij si në verën e kaluar ashtu edhe në afatin kalimtar të janarit, por këtë herë duket e vështirë që drejtuesit e klubit ta kundërshtojnë një kërkesë të re.

Portieri çek u transferua te Tottenhami në janar 2025 nga SK Slavia Prague për rreth 12.5 milionë funte, me shpresën se brenda një sezoni mund të bëhej portieri titullar i skuadrës.

Megjithatë, pas episodit të ndodhur në stadiumin “Metropolitano”, perspektiva e tij në klub është bërë shumë më e pasigurt.

Çështja mund të ketë pasoja edhe në drejtimin sportiv të klubit.

Në Angli është vënë në diskutim edhe puna e drejtorit sportiv Johan Lange, si për menaxhimin e situatës me portierin, ashtu edhe për zgjedhjen e trajnerit Tudor në bankinë.

Kështu, ajo që filloi si një mbrëmje e vështirë në fushë është kthyer në një rast të vërtetë brenda klubit londinez, me të ardhmen e Kinskyt që mund të vendoset në afatin kalimtar të verës. /Gazeta Express