Kancelari i Gjermanisë, Friedrich Merz, duke folur pas takimit me presidentin amerikan, Donald Trump, tha se i bëri thirrje kreut të Shtëpisë së Bardhë që t’i bëjë trysni homologut rus, Vladimir Putin, rreth luftës në Ukrainë.

“Rusia këtu po luan për kohë dhe, duke e bërë këtë, po vepron gjithashtu kundër vullnetit të presidentit amerikan. Në bisedimet e sotme, unë bëra thirrje për rritje të presionit ndaj Moskës” – tha Merzi para gazetarëve, raporton agjencia e lajmeve “Reuters”.

Shtetet e Bashkuara, Rusia dhe Ukraina po marrin pjesë në bisedime trepalëshe me qëllim të sigurimit të një marrëveshjeje të paqes. Megjithatë, kancelari gjerman tha se vetëm një pakt i mbështetur nga Evropa do të mund të ishte i qëndrueshëm.

“Ne nuk jemi të përgatitur për të pranuar një marrëveshje që është negociuar mbi kokat tona” – tha Merzi.

Ai tha më tej se Gjermania dhe ShBA-ja e ndajnë dëshirën e përbashkët për ta hequr regjimin e tanishëm të Iranit nga pushteti.

Në anën tjetër, Trumpi tha në Zyrën Ovale se Gjermania ka ofruar ndihmë në fushatën ushtarake kundër Iranit duke i lejuar forcat amerikane që të kenë qasje në baza të caktuara, duke e krahasuar këtë shtet evropian me Britaninë e Spanjën, të cilat i kritikoi për mungesë bashkëpunimi.