Rayan Cherki ‘zgjedh’ klubin e Premier League ku dëshiron të transferohet mes interesimit nga Liverpool dhe Manchester City
Rayan Cherki pritet të kalojë në Premier League.
21-vjeçari ka tërhequr interes të madh falë paraqitjeve të tij në Ligue 1 me Lyonin, ku sezonin e kaluar shënoi 12 gola në 44 ndeshje në të gjitha kompeticionet.
Manchester City ka qenë duke ndjekur situatën e tij ndërsa kërkon të forcojë skuadrën para Kupës së Botës për Klube që mbahet këtë muaj në Shtetet e Bashkuara.
Kampionët e Premier League, Liverpool, gjithashtu janë përfshirë në garë, me trajnerin Arne Slot që ka shkurtuar pushimet për të takuar personalisht talentin francez.
Por sipas Florian Plettenberg, Cherki ka vendosur të firmosë me Manchester Cityn.
Ai pritet të nënshkruajë një kontratë deri në vitin 2030 dhe marrëveshja e transferimit pritet të jetë në rangun e 29-34 milionë paundëve.
Gazetari gjerman Plettenberg raporton se “kushtet personale nuk ishin kurrë një problem” dhe se kampi i lojtarit shpreson për një “marrëveshje të shpejtë” para se të bëhet një njoftim zyrtar.
Cherki ka qenë te Lyoni gjatë gjithë karrierës së tij, pasi ka dalë nga akademia e të rinjve të klubit.
Por ai këmbëngul se është gati për të kaluar në një klub të madh këtë verë.
“Jam gati për çdo sistem. Punoj çdo ditë, fizikisht dhe mendërisht, për të qenë gati,” i tha ai L'Equipe.
“Më e rëndësishmja është të zgjedh opsionin më të mirë për mua, për t’u zhvilluar si person dhe si futbollist.”
Cherki shtoi: “Asgjë nuk është e sigurt. Por do ta them: bëra gjithçka që doja te OL, isha një Lyonnais i vërtetë dhe dhashë gjithçka për klubin tim. Nuk e lashë anijen kur ishte në vështirësi. Qëndrova, shtrëngova dhëmbët. Kam qarë, kam qeshur, jam frikësuar. Por një burrë duhet të jetë i tillë, kjo është pjesë e ADN-së së tij. Edhe kur është e vështirë, edhe kur qan, edhe kur je i frikësuar, duhet të shkosh në luftë për klubin tënd.”
Cherki nuk është lojtari i vetëm që pritet t’i bashkohet Pep Guardiolës në Etihad, pasi edhe mesfushori holandez Tijjani Reijnders është shumë afër kalimit te City.
Manchester City ka arritur një marrëveshje prej 46.3 milionë paundësh me AC Milan për transferimin e Reijnders. /GazetaExpress/
