Francesco Totti është një nga futbollistët më të mëdhenj italianë në histori. Ai fitoi Kupën e Botës në vitin 2006 dhe kujtohet me dashuri të veçantë në kryeqytet, ku kaloi tërë karrierën e tij me Romën.

Sulmuesi është një nga figurat më ikonike të lojtarëve “një-klubësh” në historinë e sportit, duke zhvilluar 783 paraqitje me klubin, shënuar mbi 300 gola dhe fituar pesë trofe me Romën, përfshirë titullin e Serie A në sezonin 2000/2001.

Ai ishte aq i mirë, saqë edhe Ronaldo Nazario ka deklaruar se italiani do të duhej ta kishte fituar “Topin e Artë” gjatë karrierës së tij, duke e renditur ndër gjashtë legjendat që nuk arritën të merrnin çmimin individual më prestigjioz të futbollit.

Duke qenë se Totti ishte kaq i dashur dhe i respektuar në botën e futbollit, djali i tij, Cristian, gjithmonë do ta kishte të vështirë të dilte nga hija e babait të tij për të ndërtuar një emër më vete. Kjo duket se ka qenë një pengesë shumë e madhe për t’u kapërcyer, gjë që e ka çuar në vendimin për t’i dhënë fund karrierës së tij në moshën vetëm 19-vjeçare.

Ndërsa shumica e futbollistëve adoleshentë mezi presin të fillojnë karrierën e tyre profesionale, Cristian Totti duket se ishte tashmë i lodhur nga pesha e pritshmërive. Që nga momenti i parë kur hyri në fushë, ai nuk mundi të shmangte krahasimet e vazhdueshme me babain e tij.

Për këtë arsye, Cristian ka vendosur t’i varë këpucët në gozhdë në moshën 19-vjeçare.

Media italiane “La Nuova” raportoi lajmin me titullin: “Mjaft më, po heq dorë nga futbolli.”

Sipas raportimit, disa faktorë çuan në këtë vendim të hershëm, por të gjithë lidhen me faktin se ai është djali i një legjende.

Gazetari Paolo Ardovino shkroi: “Përvoja e tij e fundit ishte në Sardenjë, një vit më parë me Olbia në Serie D. Disa paraqitje, shumë presion mediatik dhe madje një debat i madh në rrjetet sociale mbi gjendjen e tij fizike. Spoiler: nuk ishte e vërtetë; gjithmonë ka pasur fizik normal për një futbollist.”

Kur “La Nuova” kontaktoi Cristianin, ai nuk dha shumë detaje përveçse konfirmoi lajmin.

Raportimi shpjegon se adoleshenti ka qenë lojtar i lirë për muaj me radhë pasi luajti për herë të fundit me Olbia në Serie D.

Ai kishte qenë pjesë e akademisë së Romës në nivelin U-17, por pati vështirësi për të marrë minuta, duke bërë vetëm dy paraqitje me gjithsej 15 minuta lojë në ekipin U-18.

Më pas, ai u transferua te skuadra Primavera e Frosinones, ku bëri vetëm katër paraqitje dhe shënoi një gol, para se të kalonte te Rayo Vallecano në janar 2024.

Edhe atje nuk pati ndikim dhe më pas iu bashkua Avezzanos në Serie D, ku qëndroi deri në gusht, përpara se të transferohej te Olbia.

Ish-trajneri Marco Amelia – ish-shok i Tottit në Kupën e Botës 2006 – punoi me Cristianin në Frosinone dhe foli me dashamirësi për të, duke theksuar se ai kishte cilësi të mjaftueshme për të ndërtuar një karrierë në ligat më të ulëta italiane: “Mendoj se ai do të kishte pasur një karrierë shumë të mirë si lojtar në Serie C dhe Serie B.”

Megjithatë, Amelia ishte i bindur se reputacioni i madh i babait të tij kishte ndikuar në vendimin për të lënë futbollin kaq herët. Ai tha: “Të qenit djali i Tottit ndikoi në mënyrën se si e vlerësonin.”

Të paktën Cristian nuk e ka lënë futbollin krejtësisht, pasi tani do të punojë me Totti Soccer School, akademinë e futbollit të themeluar nga babai i tij dhe e menaxhuar nga xhaxhai i tij, Riccardo.

Në këtë projekt të ri, 19-vjeçari do të bashkëpunojë me menaxherin e përgjithshëm Claudio D’Ulisse, duke u fokusuar në zbulimin dhe zhvillimin e talenteve të reja të futbollit./GazetaExpress/