E ardhmja e Frenkie de Jong si lojtar i Barcelonës ka qenë objekt spekulimesh të shumta gjatë viteve të fundit, por tani duket se ai do të qëndrojë në klub për të ardhmen e afërt.

Vitit të kaluar, dukej thuajse e sigurt që de Jong do të largohej në vitin 2025. Ai pati vështirësi pas rikthimit nga një dëmtim serioz në kyçin e këmbës, çka bëri që Marc Casado të preferohej ndaj tij në formacionin bazë të Hansi Flick. Megjithatë, në gjashtë muajt e fundit, ai ka përmbysur situatën dhe tani konsiderohet si një lojtar i pazëvendësueshëm për katalanasit.

Pikërisht për këtë arsye, ai është afruar edhe më shumë drejt rinovimit të kontratës – një hap i rëndësishëm duke pasur parasysh se kontrata aktuale i skadon verën e ardhshme. Megjithatë, procesi ka mbetur pezull javët e fundit për shkak se de Jong ka qenë në përpjekje për të ndërprerë marrëdhënien me menaxherin e tij të kahershëm, Ali Dursun.

Fatmirësisht për Barcelonën dhe vetë de Jongun, kjo tashmë ka ndodhur. Sipas “Sport”, 27-vjeçari tani përfaqësohet nga Pini Zahavi. Ky i fundit është takuar tashmë me Joan Laportën dhe Hansi Flick për të diskutuar kontratën e re të holandezit, dhe sipas “El Chiringuito”, ky takim ka ndodhur të premten.

Tani që de Jong ka ndryshuar agjent, pritet që Barcelona të përmbyllë shumë shpejt marrëveshjen e re. Mendohet se tashmë ekziston një marrëveshje në parim mes lojtarit dhe klubit, kështu që mund të mbetet vetëm çështje formaliteti – hartimi dhe nënshkrimi i kontratës sapo ai të rikthehet për fazën përgatitore.

Për Barcelonën, mbajtja e de Jong është një vendim i lehtë. Ai pritet të jetë ende një element kyç për Flick. Edhe pse sezoni i ardhshëm mund ta gjejë më pak të padiskutueshëm për shkak të rikthimit të Marc Bernal, ai mbetet një lojtar i rëndësishëm për skuadrën.