Barcelona nuk pritet të bëjë asnjë afrım gjatë muajit janar, por ekziston mundësia që disa lojtarë të largohen. Në këtë fazë, një nga kandidatët kryesorë për t’u larguar mund të jetë kapiteni i skuadrës, Marc-André ter Stegen.

Ter Stegen nuk ka luajtur ende këtë sezon pasi iu nënshtrua një operacioni në shpinë gjatë verës, por kur të rikthehet, nuk do të jetë pjesë e planeve të Hansi Flick. Duke qenë se ai dëshiron me ngulm të jetë titullar me Gjermaninë në Kupën e Botës 2026, do t’i duhet të largohet për ta realizuar këtë ëndërr – dhe mundësitë nuk i mungojnë, pasi ka tërhequr interesin e klubeve si Manchester United dhe Newcastle United.

Megjithatë, sipas “Diario AS”, Ter Stegen vazhdon të jetë i vendosur që të mos largohet nga Barcelona, një qëndrim që e kishte mbajtur edhe gjatë verës para se t’i nënshtrohej operacionit.

Portieri gjerman e sheh veten si shumë të aftë për të rivalizuar Joan Garcian për vendin e titullarit në formacionin e Flick, por për momentin, trajneri nuk ka në plan të ndryshojë gardianin aktual, ish-portierin e Espanyolit.

Sipas raportit, Barcelona nuk do ta pengojë nëse Ter Stegen vendos të qëndrojë, por i ka bërë të qartë se nuk do të ketë shumë minuta në fushë, përveç nëse Garcia pëson një tjetër dëmtim – ai aktualisht është jashtë fushave për shkak të një operacioni të lehtë në gju. Prandaj, për Ter Stegen do të kishte kuptim të kërkonte një largim nëse dëshiron të luajë në Botërorin e ardhshëm.

Mbetet për t’u parë si do të reagojë Ter Stegen ndërsa afrohet merkatoja e dimrit. Një largim – qoftë edhe huazim – do të ishte një zgjidhje logjike për të, por për momentin, ai vazhdon të shpresojë se do të rikthehet si numri një i Barcelonës./GazetaExpress/