Udhëtimi i Real Madridit në Kupën e Botës për Klube 2025 përfundoi me një humbje të rëndë 4–0 ndaj Paris Saint-Germain në gjysmëfinale.

Kjo disfatë i jep fund sezonit për “Los Blancos”, por shënon një fillim të ri për Jude Bellingham, i cili do t’i nënshtrohet më në fund një ndërhyrjeje kirurgjikale në shpatull.

Siç është raportuar prej javësh, mesfushori anglez ka vendosur të kryejë operacionin për problemin që ka vuajtur që nga nëntori i vitit 2023, kur pësoi një zhvendosje të shpatullës në ndeshjen kundër Rayo Vallecano. Prej atëherë, ai ka luajtur në disa raste me një mbështetëse mbrojtëse, duke duruar dhimbjen gjatë gjithë sezonit. Tani, pas përfundimit të sezonit, ai ka zgjedhur të zgjidhë përfundimisht problemin me ndërhyrje kirurgjikale, sipas gazetarit Fabrizio Romano.

Operacioni pritet ta mbajë jashtë fushave për 3 deri në 4 muaj, në varësi të ecurisë së rikuperimit pas operacionit. Si pasojë, Bellingham do të mungojë në fillim të sezonit 2025/26 me Real Madridin.

LaLiga është planifikuar të nisë më 16 gusht, por Real Madridi mund të kërkojë shtyrje të ndeshjes hapëse, në përputhje me rregullat e vendosura nga Shoqata e Futbollistëve Spanjollë (AFE), për shkak të angazhimit në Kupën e Botës për Klube.

Megjithatë, pavarësisht datës së parë zyrtare, Bellingham pritet të mungojë deri në tetor apo edhe nëntor. Ai mund të humbasë deri në 12 ndeshje të LaLigas, përfshirë edhe El Clásico-n kundër Barcelonës më 26 tetor në “Santiago Bernabéu”. Po ashtu, do të mungojë në katër ndeshjet e para të fazës së grupeve në Ligën e Kampionëve, si dhe në pauzat ndërkombëtare të Anglisë në shtator dhe tetor.

Mungesa e Bellingham përbën padyshim një goditje për Real Madridin, por klubi mbetet i bindur në profesionalizmin dhe përkushtimin e lojtarit, duke besuar se ai do të bëjë gjithçka për të përshpejtuar rikuperimin dhe për t’u rikthyer sa më shpejt nën drejtimin e Xabi Alonso-s./GazetaExpress/