Zgjedhjet presidenciale te Barcelona-s po afrohen dhe, edhe pse Lionel Messi nuk ka asnjë dëshirë të përfshihet në këtë proces, emri i tij vazhdon të jetë në qendër të fushatës. Sipas raportimeve nga media spanjolle, kandidatë të ndryshëm po përdorin referenca dhe mesazhe të tërthorta për legjendën argjentinase, pa dijeninë apo pëlqimin e tij.

Burime pranë Messit kanë bërë të qartë se ai nuk ka zhvilluar asnjë bisedë me asnjë prej kandidatëve për president dhe nuk ka ndërmend ta bëjë këtë gjatë kohës sa procesi zgjedhor është në zhvillim. Që nga fillimi, ai ka zgjedhur të qëndrojë plotësisht jashtë politikës së brendshme të klubit dhe nuk dëshiron të ndikojë në asnjë kandidaturë.

Një nga rastet që bëri më shumë bujë ishte vendosja e një pankarte në Barcelonë me mesazhin “Mezi presim të të shohim sërish”, që u interpretua menjëherë si një thirrje për rikthimin e Messit. Edhe pse emri i tij nuk u përmend drejtpërdrejt, mesazhi ishte i qartë për tifozët. Megjithatë, kampi i lojtarit thuhet se u befasua nga kjo lëvizje dhe nuk kishte dijeni paraprake për të.

Po ashtu, raportohet se ka pasur përpjekje për të krijuar kontakte me persona pranë argjentinasit, por pa arritur në ndonjë komunikim të drejtpërdrejtë me të. Kandidatët kanë sqaruar se çdo komunikim i mëhershëm ka ndodhur vite më parë dhe jo në kuadër të kësaj fushate.

Ndërkohë, ish-presidenti Joan Laporta ka folur publikisht për marrëdhënien e tij me Messin, duke komentuar largimin e tij nga klubi dhe mundësinë e një ndeshjeje lamtumire në të ardhmen. Sipas tij, vendimi përfundimtar i takon vetë lojtarit.

Megjithatë, nga ana e Messit mesazhi mbetet i njëjtë: ai nuk do të përfshihet në asnjë formë në garën për president të Barcelonës. Edhe nëse disa zhvillime të fushatës nuk i kanë pëlqyer, ai ka zgjedhur të qëndrojë në distancë dhe të mos lejojë që emri i tij të përdoret si pjesë e strategjive elektorale. /GazetaExpress