Lionel Messi e rigjeti ndjesinë e golit me dy realizime, ndërsa Inter Miami u rikthye te fitorja duke e shkatërruar 5-1 New York Red Bulls në Major League Soccer të shtunën.

Sezoni i zjarrtë i Messit u trondit të mërkurën, kur Miami u mund 3-0 nga FC Cincinnati.

Por superylli argjentinas u rikthye në formën e tij më të mirë, teksa Miami tregoi spektakël në “Sports Illustrated Stadium” në Harrison, New Jersey, për të siguruar një fitore të thellë.

Red Bulls kërcënuan të shkaktonin një tjetër befasi kur Alexander Hack shënoi në minutën e 14-të, duke kaluar vendasit në epërsi.

Por Messi menjëherë orkestroi reagimin e Inter Miami-t pas asaj goditjeje, duke dhënë një pasim fantastik për ish-bashkëlojtarin te Barcelona, Jordi Alba, i cili barazoi rezultatin në minutën e 24-t.

Messi më pas bashkëpunoi sërish me Albën për golin e dytë të Miamit, duke dhënë një tjetër pasim të shkëlqyer për spanjollin, i cili krosoi për Telasco Segovia që e shtyu topin në rrjetë në minutën e 27-të.

Segovia realizoi edhe golin e tij të dytë në fund të pjesës së parë, duke e çuar Miamin në kontroll të plotë të ndeshjes.

Messi mori përsipër gjithçka në pjesën e dytë, teksa Miami u shfaq i papërmbajtshëm.

Një pasim magjik i një tjetër ish-bashkëlojtari të Barcelonës, Sergio Busquets, e nxori fituesin e Kupës së Botës për Argjentinën përballë portës në minutën e 60-të.

Messi u tregua i qetë, mashtroi portierin e Red Bulls, Carlos Coronel, me një finte dhe e dërgoi topin në rrjetë për 4-1.

Një tjetër kombinim i “veteranëve” të Barcelonës solli golin e dytë personal të Messit: Luis Suarez krosoi nga e majta dhe Messi e kontrolloi topin në zonë për ta goditur fuqishëm dhe për ta dërguar në rrjetë, duke vulosur fitoren.