Ministri i Sportit, Andrea Abodi, ka deklaruar se zhvillimi i ndeshjes AC Milan – Como në Australi është “zgjidhja më e përshtatshme” për këtë takim të Serie A.
Ndeshja nuk mund të zhvillohet në San Siro në shkurt të vitit 2026, pasi stadiumi do të përdoret për ceremoninë hapëse të Lojërave Olimpike Dimërore Milano-Cortina.
Në vend që të gjendej një stadium alternativ pranë Milanos, Lega Serie A, Milan dhe Como kanë punuar për të bërë histori, duke organizuar ndeshjen e parë të Serie A jashtë territorit italian.
Pengesa më e madhe vinte nga UEFA, e cila këtë javë dha dritën jeshile për zhvillimin e takimit në Perth, Australi.
“Milan–Como në Australi është ndoshta zgjidhja më e përshtatshme për klubet,” – tha ministri Abodi për Tuttomercatoweb dhe agjencinë ANSA.
“E shoh këtë si një mundësi të mirë për të promovuar futbollin italian, një kampionat që duhet të bëhet shumë më ndërkombëtar sesa është aktualisht. Nëse shohim të ardhurat, ato nga tregjet ndërkombëtare përbëjnë vetëm një të katërtën e atyre që vijnë nga Italia, gjë që tregon se diçka nuk shkon. Gjithashtu, meqë kjo zgjidhje u diktua nga një situatë emergjente për stadiumin, mund të shihet si një mundësi pozitive.”
Fansat, natyrisht, janë të irrituar që ndeshja e Serie A po zhvendoset në anën tjetër të globit, duke e bërë të mundshme që ora e fillimit të jetë e pazakontë.
“Nuk është një situatë që mund të përsëritet lehtë. Megjithatë, futbolli u përket tifozëve, ndaj u kërkojmë mbështetësve të Milanit dhe Comos të bëjnë një sakrificë të vogël,” – shtoi Abodi.
“E kuptoj zhgënjimin e tyre, por shpresoj që edhe ata të kuptojnë arsyet pse u mor ky vendim për ta çuar ndeshjen në anën tjetër të botës, dhe se kjo mund të sjellë efektet që shpresojmë.”
Kujtojmë se Milan ka zhvilluar më parë disa ndeshje miqësore në Perth gjatë viteve të fundit, por kjo do të jetë ndeshja e parë zyrtare që luhet atje.
Ndërkohë, Superkupa e Italisë do të zhvillohet përsëri në Arabinë Saudite./GazetaExpress/
