Raportime nga mediat italiane bëjnë të ditur se Milani do të dërgojë një mjek të klubit në Londër të hënën për të vlerësuar situatën e Jean-Philippe Matetas, i cili gjatë testeve mjekësore te “Rossonerët” raportohet se ka shfaqur shqetësime në gju.

Sipas burimeve si Gianluca Di Marzio, Daniele Longo dhe Orazio Accomando, Milani ende shpreson të finalizojë transferimin e Matetas para mbylljes së afatit kalimtar të hënën, por po vlerëson situatën me kujdes.

Sipas raportimeve të ndryshme, Milani do të dërgojë një mjek të klubit në Mbretërinë e Bashkuar për të bërë vlerësimin e situatës në orët e para të së hënës.

Afati kalimtar i janarit do të mbyllet në orën 20:00 të hënën, 2 shkurt, si në Serie A ashtu edhe në Premierligë.

“Rossonerët” kanë një marrëveshje me Crystal Palace mbi një shumë mbi 30 milionë euro.

Klubi nga Londra e Jugut ka dhënë dritën jeshile për testet mjekësore të Matetas pas sigurimit të zëvendësuesit të tij: Jørgen Strand Larsen nga Wolverhampton Wanderers.

Mateta filloi testet mjekësore në Londër të dielën, por sipas përditësimeve të fundit ka pasur shqetësime për një problem të mundshëm në gju gjatë vlerësimit.

Kjo ka bërë që Milani të jetë i kujdesshëm, duke marrë parasysh shumat që do të kushtojë transferimi i tij.

Ndërkohë, Milani ka kaluar një situatë të ngjashme me Victor Boniface gjatë merkatos së verës, kur lojtari nga Nigeria erdhi në Itali për teste mjekësore, por më pas u udhëzua të kthehej në Gjermani për shkak të shqetësimeve mjekësore.

Një vendim përfundimtar për Milanin dhe Matetan pritet të merret të hënën./GazetaExpress/