Presidenti i Milanit, Paolo Scaroni, ka zbuluar se Rossonerët dhe Interi synojnë të luajnë ndeshjen e tyre të parë në stadiumin e ri në vitin 2030.

Milan dhe Inter kanë marrë miratimin për të blerë zonën e San Siros, përfshirë edhe Stadio Meazza, dhe tani po përgatisin një projekt për stadiumin e tyre të ri, që do të jetë në bashkëpronësi.

“Qëllimi është të finalizojmë aktin e shitjes deri në tetor, dhe në atë moment do të bëjmë pagesën e parë prej 73 milionë eurosh,” tha Scaroni për Milano Finanza.

“Prej asaj kohe, mund të fillojë faza e dizajnit të detajuar të stadiumit të ri. Ky është një projekt që tashmë i kemi dhënë Norman + Partners dhe MANICA, dy liderë në fushën e tyre. Për të parë projektin e plotë do të duhen midis gjashtë dhe tetë muaj.”

Raporte në Itali kanë pretenduar se klubet synojnë debutimin në stadiumin e ri në vitin 2031, por Scaroni vendosi një afat të ndryshëm, duke konfirmuar se punimet do të fillojnë në 2027.

“Absolutisht, përveçse nëse ndodhin pengesa të vogla, të cilat gjithmonë mund të ndodhin në një projekt të kësaj madhësie, qëllimi është të përfundojmë stadiumin deri në vitin 2030.”

Kjo do të thotë se sezoni i parë i Milanit dhe Interit në stadiumin e ri do të jetë 2030-31.

“Idealisht, po. Kështu, ne mund të kryejmë testimet e nevojshme dhe ta sjellim objektin në funksionim të plotë në kohë për Europianin e 2032, ku ai do të luajë një rol të madh,” përfundoi Scaroni.

Milan dhe Inter kanë ndarë stadiumin ikonë Stadio Meazza që nga sezoni 1947-48.

Stadiumi u inaugurua në vitin 1926 me një ndeshje midis dy ekipeve milaneze, ku Nerazzurri fituan 6-3.

Këtë mbrëmje, Milan do të luajë në San Siro duke pritur rivalët rajonalë, Cremonese, ndërsa nesër, të dielën më 5 tetor, Interi do të vizitojë Juventusin në Torino./GazetaExpress/