Milani po ringjall interesimin e tij për një shkëmbim gjatë afatit kalimtar të janarit, që do të shihte sulmuesin Santiago Gimenez të kalonte tek AS Roma, ndërsa sulmuesi ukrainas Artem Dovbyk do të transferohej në drejtim të kundërt, te Milani.

Kështu raporton Daniele Longo nga “Calciomercato.com”, pas dështimit të dy klubeve për të finalizuar një marrëveshje të ngjashme gjatë ditëve të fundit të afatit të verës.

Marrëveshja fillestare e propozuar parashikonte një shkëmbim huazimi të drejtpërdrejtë mes dy sulmuesve, ide e nxitur nga nevojat taktike të të dy stafeve teknike.

Trajneri i Milanit, Massimiliano Allegri, ishte i interesuar të merrte një qendërsulmues të fuqishëm - profil që i përshtatet mirë Dovbykut - ndërsa trajneri i Romës, Gian Piero Gasperini, kërkonte një lojtar me karakteristika të ndryshme nga ato të ukrainasit, duke preferuar një sulmues në stilin e Gimenezit.

Sipas Longos, marrëveshja u rrëzua në ditët e fundit të merkatos për shkak të mosmarrëveshjeve në kushtet e kontratës.

Drejtuesit e Milanit këmbëngulën për një huazim të thjeshtë pa detyrim blerjeje, ndërsa Roma kërkonte të përfshinte një opsion ose detyrim për blerjen përfundimtare të Gimenezit.

Burime të afërta me klubet tregojnë se bisedimet mund të rihapen në janar, raporton “Get Italian Football News”.

Ideja për të marrë Dovbykun - lojtar që Milani e ka ndjekur prej të paktën dy vitesh - mbetet shumë tërheqëse për “Rossonerët”.

Një marrëveshje shkëmbimi me Gimenezin do t’i mundësonte Milanit të shtonte një profil ndryshe në sulm, në përputhje me vizionin e Allegrit, pa bërë një investim të madh financiar.

Çdo marrëveshje përfundimtare do të varet nga vlerësimi aktual që do të bëjë drejtuesia e Romës.

Dy sulmuesit po kalojnë në sezon të tmerrshëm, sa i përket shënimit të golave.

Gimenez i Milanit ka vetëm një gol në këtë sezon, edhe atë në Kupën e Italisë, teksa në Serie A ende nuk ka shënuar gol.

Ndërkohë, homologu i tij ukrainas i ka shënuar dy gola deri më tani në Serie A./GazetaExpress/