Milani ka rritur ndjeshëm përpjekjet për të siguruar të ardhmen e Mike Maignan, me negociatat për kontratën e re që tashmë kanë hyrë në një fazë vendimtare.

Pas muajsh pasigurie, kuqezinjtë i kanë paraqitur zyrtarisht portierit francez një ofertë për rinovim, teksa kontrata aktuale e tij skadon në muajin qershor. Propozimi reflekton dëshirën e klubit për ta zgjidhur sa më shpejt këtë çështje dhe për ta konfirmuar Maignan si një nga figurat kyçe të skuadrës.

Sipas raportimeve, marrëveshja e re do të jetë për tre vite, me mundësi zgjatjeje edhe për një sezon të katërt. Milani i ka ofruar Maignan një pagë fikse prej rreth 5.5 milionë euro neto në sezon, një rritje e konsiderueshme që do ta vendoste atë ndër lojtarët më të paguar të ekipit.

Paketa përfshin gjithashtu bonuse të lidhura me paraqitjet dhe objektivat individuale, të konsideruara të arritshme, të cilat mund ta çojnë fitimin total të portierit në 6.5–7 milionë euro neto në sezon. Kjo do ta barazonte Maignan me Rafael Leão në krye të strukturës së pagave të klubit.

Në ofertë janë përfshirë edhe stimuj shtesë të lidhur me objektivat kolektive, si kualifikimi në Ligën e Kampionëve dhe sukseset në garat vendore.

Shtysë e fortë për rinovimin ka ardhur nga drejtori sportiv Igli Tare dhe trajneri Massimiliano Allegri, të cilët e shohin Maignan si të paprekshëm për ciklin e ardhshëm të skuadrës.

Me shifrat tashmë të qarta dhe vullnetin e ndërsjellë, Milani është gjithnjë e më optimist se marrëveshja përfundimtare do të arrihet së shpejti. /GazetaExpress