Milani ka konfirmuar se mesfushori Ruben Loftus-Cheek i është nënshtruar një operacioni, është liruar nga spitali dhe pritet të rikthehet në fushë pas rreth tetë javësh, pas një dëmtimi të rëndë në fytyrë gjatë humbjes 1-0 ndaj Parma në Serie A të dielën mbrëma.

Ish-mesfushori i Chelseat, Crystal Palacet dhe Fulhamit u largua nga fusha me barrelë dhe me mbajtëse qafe pas një përplasjeje të rëndë me portierin e Parmës, Edoardo Corvi, vetëm 11 minuta pas fillimit të ndeshjes në “San Siro”.

Loftus-Cheek u dërgua menjëherë në spitalin “San Carlo” për ekzaminime urgjente, të cilat konfirmuan një frakturë në kockën alveolare të nofullës.

Sipas raportimeve në Itali, anglezi humbi edhe disa dhëmbë si pasojë e incidentit.

Sipas “Sky Sport Italia”, fillimisht ishte planifikuar që operacioni të kryhej menjëherë të dielën në mbrëmje, por u shty për të hënën në mëngjes për të organizuar një ekip kirurgjik në spitalin “San Paolo” në Milano, i cili ka një departament të specializuar maksilofacial.

Milani publikoi një deklaratë zyrtare ku konfirmoi ndërhyrjen kirurgjikale dhe periudhën e rikuperimit.

“Milani njofton se Ruben Loftus-Cheek pësoi një traumë të rëndë në fytyrë, e cila rezultoi në një frakturë të procesit alveolar të nofullës,” thuhet në deklaratën e klubit.

“Lojtari u shtrua në departamentin e Kirurgjisë Maksilofaciale dhe Klinikës Dentare të ‘ASST Santi Paolo’ e ‘Carlo’, ku sot iu nënshtrua një operacioni të kryer nga Dr. Luca Autelitano. Ndërhyrja për reduktimin dhe stabilizimin e frakturës ishte plotësisht e suksesshme. Ruben është në gjendje të mirë dhe tashmë është liruar nga spitali”, thuhet tutje.

“Koha e parashikuar e rikuperimit është rreth tetë javë”, mbyllet deklarata e klubit./GazetaExpress/