Milani raportohet se ka vënë sytë te mesfushori i Bournemouth, Tyler Adams, ndërkohë që negociatat për transferimin e Ardon Jasharit janë pezulluar përkohësisht.

Sipas Tuttosport (nëpërmjet MilanNews), kuqezinjtë po shqyrtojnë mundësinë e afrimit të mesfushorit të kombëtares amerikane (USMNT), si një përforcim shtesë për mesfushën qendrore.

Jashari dëshiron Milanin, por negociatat janë ndërlikuar

Milani tashmë ka afruar Samuele Ricci dhe Luka Modrić në këtë repart, por drejtuesit po kërkojnë edhe një emër të tretë për të kompletuar mesfushën.

Ardon Jashari, talenti i Club Brugge dhe i përfaqësueses së Zvicrës, mbetet objektivi kryesor. Megjithatë, pavarësisht se lojtari dëshiron të transferohet në Milano dhe ka rënë dakord për kushtet personale, Milani ende nuk ka gjetur marrëveshje me klubin belg për çmimin e kartonit të tij.

Jashari nuk ishte pjesë e finales së Superkupës së Belgjikës këtë të dielën, ndërsa kapiteni i Brugge, Hans Vanaken, paralajmëroi se për të siguruar shërbimet e 22-vjeçarit, Milani duhet të bëjë një ofertë rreth 40 milionë euro.

Tyler Adams në vëmendjen e kuqezinjve – çmimi 25-30 milionë euro

Nëse operacioni për Jasharin dështon, Milani mund të kalojë në planin B: Tyler Adams, mesfushori 25-vjeçar i Bournemouth, i cili vlerësohet me një çmim prej 25 deri në 30 milionë euro.

Një tjetër alternativë për kuqezinjtë mbetet edhe mesfushori i ri i Valencias, Javi Guerra, i cili gjithashtu po ndiqet nga disa klube europiane.

Milani duket i vendosur të kompletojë përforcimet në mesfushë përpara fillimit të sezonit, por do të duhet të lëvizë me kujdes për të gjetur balancën mes cilësisë dhe çmimit të lojtarëve që kërkon. /GazetaExpress/