Marko Miljkoviq, i arrestuar dhe i akuzuari i dytë në procesin gjyqësor kundër grupit kriminal të Veljko Belivukut, ka bërë dje deklarata tronditëse në Gjykatën Speciale në Beograd, duke thënë se nga e gjithë grupi vetëm ai ka përdorur telefonin e enkriptuar Sky, dhe atë ekskluzivisht për komunikim me Aleksandar Vulin, i cili në atë kohë ishte ministër i Policisë së Serbisë.
Sipas Miljkoviqit, telefonin Sky ia kishte dhënë vetë Vulin, ndërsa komunikimi nuk është zhvilluar me asnjë person tjetër.
“Askush tjetër nuk ka përdorur Sky. Vetëm unë, dhe vetëm me Aleksandar Vulinin. Ai ma dha telefonin. Nuk shoh këtu këto komunikime, sepse Sky-n e kam përdorur vetëm me të”, deklaroi Miljkoviq në sallën e gjyqit.
Gjatë seancës së sotme, prokuroria vazhdoi paraqitjen e provave nga aplikacioni Sky, përfshirë mesazhe dhe fotografi që, sipas aktakuzës, lidhen me vrasjen e Aleksandar Gligorijeviqit. Janë shfaqur mesazhe që i atribuohen Veljko Belivukut, ku në njërin prej tyre thuhet:
“Nëse gjithçka shkon mirë, për disa ditë shkon në thertore.”
Janë paraqitur gjithashtu fotografi të një koke dhe trupi, për të cilat prokuroria pretendon se i përkasin Gligorijevićit – pretendim që është mbështetur nga dëshmitarët e penduar Srđan Lalić dhe Nikola Spasojević.
Megjithatë, të akuzuarit i mohuan këto pretendime, duke thënë se personi në fotografi nuk është Gligorijeviqi dhe se pamjet janë të manipuluara.
Veljko Belivuk deklaroi se tabelat dhe provat digjitale janë ndryshuar, ndërsa Miljkoviq shkoi edhe më tej duke thënë se personi në fotografi mund të mos jetë as njeri, por “i ngjan një kukulle”.
Në kontekstin e komunikimeve Sky, Miljkoviq përsëriti se nuk ka komunikuar me askënd tjetër përveç Aleksandar Vulinit, ndërsa në proces përmenden edhe kode dhe iniciale që, sipas mediave dhe interpretimeve të prokurorisë, lidhen me figura të larta të pushtetit serb, përfshirë presidentin Aleksandar Vuçiq.
