Ministri britanik i Tregtisë, Chris Bryant, ka lëshuar kritika të ashpra ndaj Prince Andrew, duke e cilësuar si “të pasjellshëm, arrogant dhe mendjemadh”, si dhe të paaftë për të ndarë interesin publik nga përfitimi personal.

Duke folur në Dhomën e Komuneve, Bryant deklaroi se sjellja e princit të rrëzuar nga detyrat mbretërore ishte e papërshtatshme për një rol publik dhe se kishte kërkuar në mënyrë të përsëritur largimin e tij, për shkak të lidhjes me Jeffrey Epstein.

Sipas ministrit, kolegë dhe nëpunës publikë i kanë rrëfyer përvoja të ngjashme nga kontaktet me Andrew, duke përshkruar “një person që ishte vazhdimisht në kërkim të vetëpromovimit dhe përfitimit personal”.

Kritika për sjelljen në vizita zyrtare

Bryant përmendi një vizitë të princit në Tonypandy për të takuar kadetë të marinës. Sipas tij, të rinjtë ishin entuziastë për të takuar një anëtar të familjes mbretërore, por Andrew këmbënguli të udhëtonte me helikopter. Ministri vuri në dukje se nëna e tij kishte vizituar dy herë zonën e Rhondda-s dhe kishte mbërritur me rrugë tokësore.

Ai shtoi se Andrew u largua herët nga aktiviteti dhe nuk tregoi interes të vërtetë për të rinjtë.

Megjithatë, Bryant sqaroi se një sjellje e tillë “nuk përbën krim”, duke shtuar me ironi se “as arroganca nuk është – fatmirësisht, besoj”.

Kërkesë për largim që në vitin 2011

Ministri britanik theksoi se që në vitin 2011 kishte kërkuar disa herë largimin e Andrew nga posti i të dërguarit special për tregtinë, pjesërisht për shkak të lidhjeve të tij me Epstein.

Sipas tij, në atë kohë, kryeministri i atëhershëm, ministri i Brendshëm dhe “shumë të tjerë në qeveri” e kishin mbrojtur vazhdimisht princin. /Panorama