Ndonëse nuk po ka prani të madhe në fushë për Juventusin, Edon Zhegrova është tejet i pranishëm në rrjetet sociale të klubit italian.
Që nga transferimi i tij në Torino, “Zonja e Vjetër” e ka postuar shumë shpesh yllin e kombëtares së Kosovës, që nga ditët e prezantimit të tij, lëvizjet në fushën e lojës (aq sa kishte mundësi të luante) dhe paraqitjet e tij në stërvitje.
Një postim i tillë erdhi ditën e sotme, me faqen zyrtare të Juventusit që ka postuar një video të veçantë për futbollistin kosovar.
“Mirësevini në spektaklin e Edon Zhegrovës”, ka shkruar Juventusi në “Instagram”.
Në video, Zhegrova shihet duke bërë nxehjet para fillimit të ndeshjes Juventus – Sassuolo.
Në atë përballje, ylli dardan u fut në lojë minutën e 88-të nga banka rezervë, mirëpo që nuk arriti të lë gjurmë dhe kështu Juventusi barazoi 1-1 me Sassuolon e Arijanet Muricit.
Në përgjithësi, Zhegrova nuk po arrin të gjejë hapësira te klubi italian, duke startuar vetëm një herë që nga ardhja e tij në Torino gjatë afatit kalimtar të verës.
Ai startoi kundër Pafosit në Ligën e Kampionëve, në tetor të vitit 2025, dhe atë u zëvendësua menjëherë pas përfundimit të pjesës së parë.
Duke marrë tri kompeticionet e mëdha, në të cilat ka luajtur sivjet Juventusi, Zhegrova është paraqitur në vetëm 21 prej tyre, duke zhvilluar vetëm 447 minuta në total.
Zhegrova kaloi te Juventusi në ditën e fundit të afatit kalimtar të janarit nga Lille, për shumën e 15.5 milionë eurove + bonuset, me shifrën që kapte pak mbi 20 milionë euro.
Më herët gjatë karrierës së tij, ylli 26-vjeçar kishte luajtur për Baselin, Genkun në futbollin profesionist, teksa kishte kaluar kohë edhe tek akademitë e St. Truiden e Standard Liege.
Në futbollin kosovar, ai u rrit në akademitë e Flamurtarit dhe Prishtinës.
Zhegrova po ashtu është i ftuar te kombëtarja e Kosovës për ndeshjen e madhe të marsit ndaj Sllovakisë, e cila luhet më 26 mars, me fillim nga ora 20:45./GazetaExpress/
