Kryeministri grek, Kyriakos Mitsotakis, u takua këtë të mërkurë me presidentin turk, Rexhep Tayyip Erdogan, në Pallatin e Bardhë në Ankara. Pas takimit, dy liderët mbajtën një deklaratë të përbashkët, duke theksuar rëndësinë e dialogut dhe bashkëpunimit mes dy vendeve.

Presidenti turk e përshkroi Mitsotakis si një mik të vlefshëm, duke shtuar se megjithëse “çështjet janë të mprehta, ato nuk janë të pazgjidhshme”. Ai shtoi se me marrëveshjet që do të nënshkruajnë, do të rrisin tregtinë e ndërsjellë mes vendeve.

“Ne besojmë se do të arrihet përparim edhe në zgjidhjen e problemeve në Egje. Marrëveshjet që po nënshkruajmë na ofrojnë bazën më të mirë për forcimin e kontakteve të ndërsjella. Ne do të bëjmë çdo përpjekje për të rritur tregtinë e ndërsjellë“, tha Erdogan.

Nga ana e tij, kryeministri grek theksoi nevojën për uljen e tensioneve mes dy vendeve, edhe në rastet kur ka mosmarrëveshje.

“Edhe kur nuk pajtohemi, le të mos shkaktojmë tensione. Është koha për të hequr çdo kërcënim midis nesh”, deklaroi Mitsotakis.

Ai nënvizoi se mes Greqisë dhe Turqisë ekzistojnë dallime të rëndësishme, duke theksuar se delimitimi i zonave detare mbetet çështja kryesore që mund të zgjidhet përmes rrugës ligjore ndërkombëtare.

“Delimitimi i zonave detare është i vetmi ndryshim që mund të ngrihet në Gjykatë, bazuar në Ligjin e Detit”, tha kryeministri grek. /Panorama