Sipas një raporti të ri nga Marca, Real Madrid është këshilluar të mos përdorë plotësisht tre lojtarë kyç gjatë Club Ëorld Cup që po zhvillohet në SHBA. Mjekët e klubit kanë marrë një raport të detajuar nga emisaret e dërguar në terren, të cilët inspektuan gjendjen e fushave – pas shqetësimeve të ngritura më parë nga Vinicius Jr në lidhje me cilësinë e fushave në Copa America.
Tre lojtarët në fjalë janë Éder Militão, David Alaba dhe Dani Carvajal, të gjithë me histori dëmtimesh serioze, përfshirë dëmtimet në ligamentet e gjurit. Raporti thekson se fusha në disa stadiume të turneut nuk janë në gjendjen optimale dhe kjo mund të rrezikojë rikuperimin e plotë të këtyre lojtarëve.
“Rekomandimi nuk nënkupton se lojtarët nuk do të luajnë asnjë minutë, por vendimi do të merret në bashkëpunim mes ndjesive të lojtarëve, opinionit të mjekëve dhe Xabi Alonsos,” shkruan Marca.
Në barazimin 1-1 të së mërkurës kundër Al Hilal, Real Madrid ishte pa disa yje përfshirë Kylian Mbappe, i cili u shtrua në spital për shkak të një rasti të rëndë të gastroenteritit. Ndërkohë, edhe Militao, Alaba dhe Carvajal munguan në atë ndeshje.
Trent Alexander-Arnold debuton në nxehtësinë e Miamit
Një moment i veçantë për Real Madridin ishte debutimi i Trent Alexander-Arnold, i cili luajti për herë të parë me fanellën e bardhë. Ish-mbrojtësi i Liverpoolit e përshkroi si një moment krenarie:
“Jam shumë i lumtur dhe krenar që kam bërë debutimin. Është diçka që shumica e futbollistëve e ëndërrojnë,” tha ai për mediat pas ndeshjes.
Megjithatë, Trent e pranoi se ndeshja ishte e vështirë, sidomos për shkak të nxehtësisë së madhe në Miami dhe rezultatit zhgënjyes:
“Kur je lojtar i Real Madridit, pritshmëria është që të fitosh çdo ndeshje.”
Real Madrid përballet me C.F. Pachuca më 22 qershor, para se të përfundojë fazën e grupeve kundër RB Salzburg të Austrisë. Me dëmtimet dhe temperaturat sfiduese në SHBA, stafi teknik i Xabi Alonsos ka një detyrë të ndërlikuar për të menaxhuar fizikun e lojtarëve dhe të ruajë balancën mes suksesit dhe kujdesit për shëndetin e tyre.
