Një transferim që dukej i parealizuar, mund të bëhet realitet. Për disa sezone, klubet e Arabisë Saudite kanë shfaqur interes për Mohamed Salahun, por deri sezonin e kaluar, sulmuesi egjiptian ishte konsideruar “i paprekshëm” nga Liverpooli, dhe ai kishte zgjedhur ta vazhdonte aventurën e tij në Angli, madje duke e nënshkruar një zgjatje kontrate edhe pas një sezoni të shkëlqyer 2024–2025.

Megjithatë, gjërat duket se kanë ndryshuar. Sezoni i fundit jo i mirë i Liverpoolit dhe performanca e Salahut pak më poshtë nivelit të zakonshëm ka sjellë tensione, të cilat kulmuan në dhjetor kur Salah e kritikoi publikisht trajnerin pasi u la në stol, përcjell “Gazeta Express”.

Që nga ai moment, ka folur seriozisht për një largim të mundshëm në fund të sezonit aktual.

Pavarësisht se përkohësisht raportohet se marrëdhënia u përmirësua pas kthimit të tij nga Kupa e Afrikës së Kombeve dhe Salah e rifitoi vendin në formacionin titullar, episodet e dhjetorit nuk janë harruar plotësisht.

Sipas burimeve jozyrtare, menaxheri i tij po negocion me klubin saudit Al Ittihad, dhe në krahasim me vitin e kaluar, lojtari duket më i hapur rreth mundësisë së një transferimi drejt Saudi Pro League.

Kjo lëvizje do të ishte e dobishme për të gjitha palët: Liverpooli mund ta përfitonte një shumë parash për kartonin e lojtarit, ndërsa Salah do ta kishte mundësinë e një sfide të re jashtë Premierligës.

Nga ana e Al Ittihad, ata kanë humbur në “merkato” disa yje francezë si Karim Benzema (te Al Hilal) dhe N’Golo Kanté (te Fenerbahçe), ndërsa Fabinho është në fund të kontratës dhe edhe Moussa Diaby është lidhur me Interin.

Kjo do të thotë se ky klub ka nevojë për një goditje të madhe për ta mbajtur nivelin konkurrues — dhe me Salah, ekipi do të ishte më i fortë. /Gazeta Express