Më herët këtë muaj, AS Monaco finalizoi marrëveshjen për të marrë në huazim Ansu Fati – dhe siç duket, ai mund të mos jetë i vetmi lojtar i Barcelonës që do t’i bashkohet skuadrës së Ligue 1 gjatë kësaj merkatoje verore.

Fati është një nga disa lojtarët që Barcelona i ka identifikuar si kandidatë për t’u larguar para fundit të verës. Marc-André ter Stegen, Andreas Christensen, Pablo Torre dhe Pau Victor gjithashtu kanë gjasa të largohen, dhe mes këtyre emrave, portieri do të ishte largimi më ideal për klubin.

Më herët këtë javë, Hansi Flick i ka bërë me dije Ter Stegen-it se ai nuk do të jetë portieri titullar i Barcelonës për sezonin e ardhshëm – madje do të jetë i treti në hierarki, pas Joan Garcia dhe Wojciech Szczesny. Duke marrë parasysh pagën e lartë, largimi i tij do të ndihmonte shumë klubin katalanas për të përmirësuar situatën financiare.

Pasi u informua se nuk llogaritet për sezonin e ri, Ter Stegen ka filluar të tërheqë interes nga disa klube në Evropë. Galatasaray dëshiron ta transferojë, ndërsa sipas Mundo Deportivo, edhe Monaco është e interesuar për të.

Para disa javësh, Monaco ka kontaktuar me përfaqësuesit e Ter Stegen për të shprehur interesin, por atëherë ata u refuzuan. Megjithatë, klubi nga Principata mbetet i interesuar dhe mund të ketë më shumë gjasa për ta bindur 33-vjeçarin tani që Barcelona i ka bërë të qartë se nuk e ka më në plane.