Álvaro Morata është shumë pranë rikthimit në futbollin italian dhe tashmë ka marrë miratimin për t’u bashkuar zyrtarisht me Como 1907. Sulmuesi madrilen, i cili ka kaluar pjesën më të madhe të karrierës së tij në Spanjë, Angli dhe Itali, do të rikthehet për herë të katërt në vendin transalpin – këtë herë për t’u bërë pika kyçe e repartit ofensiv në projektin ambicioz të drejtuar nga Cesc Fàbregas.

Operacioni që përfshin Milanin, Galatasaray dhe Como-n është në fazat përfundimtare. Klubi nga Lombardia e kishte huazuar Moratën te skuadra turke në fillim të vitit 2025 për një shumë afër gjashtë milionë eurove. Megjithatë, me mbërritjen e Víctor Osimhen në Stamboll, Galatasaray ka dhënë dritën jeshile për të liruar sulmuesin spanjoll, duke lehtësuar largimin e tij të parakohshëm.

Sipas AS, marrëveshja mes të gjitha palëve përfshin detyrimin e Como-s për të respektuar kushtet e mëparshme të rëna dakord: të paguajë nëntë milionë euro deri në qershor të vitit 2026 për të përfunduar transferimin e plotë të Moratës. Përveç kësaj, klubi italian do të mbulojë edhe shumën që Galatasaray kishte paguar tashmë, duke përmbushur kështu angazhimin financiar që garanton ardhjen e tij.

Morata, i cili ruan një marrëdhënie shumë të mirë personale me Fàbregas që nga koha kur luajtën së bashku te Chelsea, është entuziast për këtë kapitull të ri. Mbeten vetëm disa detaje për t’u finalizuar që përfaqësuesi spanjoll të veshë fanellën e Como-s, skuadër që llogarit shumë te përvoja dhe cilësia e tij për të konsoliduar pozitat në Serie A./GazetaExpress/