Vedat Muriqi e pati një fundjavë fantastike në nivelin personal.
Ylli kosovar i realizoi dy gola për Mallorcën, të cilat fatkeqësisht në fund ia siguruan vetëm një pikë ekipit ishullor në barazimin 2:2 me Osasunan.
Sidoqoftë, paraqitja e “Piratit” nga Kosova është vlerësuar lartë nga faqja e specializuar Sofascore.
32-vjeçari është përfshirë në ekipin ideal të javës së 27-të të La Ligas, shkruan “Gazeta Express”.
Madje, prizrenasi është vlerësuar me notë mjaft të lartë, 8,6, ndërsa e përbën sulmin bashkë me Budimir e Boye.
Muriqi ia siguroi epërsinë e dyfishtë Mallorcas, por që ekipi i tij nuk diti ta ruante atë.
Ish-futbollisti i Rizesporit, Fenerbahçes e Lazios e ka arritur formën kulmore.
Ai i ka realizuar 18 gola në La Liga në këtë sezon, një rekord absolut për të.
Muriqi gjendet në vendin e dytë në listën e golashënuesve, 5 gola larg liderit, Kylian Mbappe në garën për "Pichichi".
Vedati e kaloi rekordin e Samuel Eto’o për gola të shënuar brenda një sezoni në La Liga me Mallorcan pasi kamerunasi i kishte realizuar 17 sosh.
Në total, gjiganti i sulmit i ka realizuar 52 gola me Mallorcan dhe gjendet veç dy gola larg legjendarit Eto’o, i cili i kishte shënuar 54 me këtë klub.
Një rekord që mund ta thyejë qysh këtë sezon, nëse vazhdon me formë të njëjtë. /Gazeta Express
