Kreu i LDK’së, Isa Mustafa, ka folur pas takimit që kanë pasur me kreun e Lëvizjes Vetëvendosje, Albin Kurtin, për të diskutuar rreth arritjes së një koalicioni për bashkëqeverisje.

Isa Mustafa ka thënë se ka qenë një takim i frytshëm, konkret e konstruktiv, megjithatë në këtë takim të sotëm nuk është arritur asgjë konkrete.

Ish-kryeministri Mustafa ka thënës se do të ketë takime intensive për arritjen e një koalicioni duke filluar nga nesër.

“Ne konstatuam bashkarisht që ajo që është punuar nga grupet punuese për harmonizim të programit qeverisës është përfunduar, nesër do të definohet përfundimisht”, ka thënë Mustafa.

Ndërkohë ka treguar se ka vullnet nga dy partitë që të mbahen kontakte intensive për të përcaktuar përgjegjësitë që dy partitë do të marrin në qeverinë e re.

“Ne shohim vullnet nga dy palët që të vazhdojmë intensivisht të mbajmë kontakte të rregullta, të përcaktojmë përgjegjësitë tona për qeverisjen e ardhshme, për një qeverisje të suksesshme”, ka potencuar Mustafa.

Në këtë konferencë për media ndërkohë nuk janë lejuar pyetje nga gazetarët./GazetaExpress/