Napoli po planifikon ta transferojë përfundimisht Rasmus Højlund nga Manchester United, me burime që e cilësojnë marrëveshjen si një “formalitet”. Klubi italian pritet ta sigurojë sulmuesin danez për rreth 43 milionë paund.

Højlund iu bashkua United në verën e vitit 2023 nga Atalanta për 64 milionë paund, por pas vetëm 14 golave në 62 paraqitje në Premier League, drejtuesit e “Djajve të Kuq” duket se janë gati të pranojnë humbje prej rreth 21 milionë paundësh.

Vështirësitë e tij për të shënuar, veçanërisht në muajt e parë, shtynë United të riorganizojë repartin ofensiv në merkato, duke investuar mbi 200 milionë paund për Benjamin Šeško, Bryan Mbeumo dhe Matheus Cunha.

Højlund pritet t’i bashkohet listës së transferimeve të dështuara të epokës Erik ten Hag, e cila i ka kushtuar shtrenjtë klubit anglez. Rasti më i spikatur mbetet Antony, i blerë për 82 milionë paund nga Ajax, por i shitur më pas për vetëm 21.6 milionë paund, duke thelluar humbjet financiare të Manchester United. /GazetaExpress