Napoli është në mes të një procesi rindërtimi të skuadrës, dhe objektivi i radhës për klubin nga jugu i Italisë është përforcimi i repartit të sulmit.

Pas sigurimit të transferimit të Kevin De Bruyne dhe investimit në talentin e ri Luca Marianucci, drejtori sportiv Giovanni Manna e ka përqendruar vëmendjen tek Ademola Lookman, sulmuesi aktual i Atalantës.

Sulmuesi nigerian, i cili ka shkëlqyer në Bergamo me 52 gola dhe 25 asistime në tre sezone, raportohet se po mendon një ndryshim ambienti pas largimit të Gian Piero Gasperinit, mbështetësit të tij kryesor në skuadër. Lookman është në kërkim të një projekti të ri ku të mund të luftojë për trofe, dhe në këtë drejtim, Napoli përfaqëson një skenar ideal.

Megjithatë, ky transferim nuk do të jetë i lehtë.

Siç raporton “Gazzetta dello Sport”, Atalanta e konsideron Lookman një lojtar kyç dhe do ta shqyrtojë largimin e tij vetëm për një shumë minimale prej 60 milionë eurosh. Napoli nga ana tjetër ka vendosur rreth 50 milionë euro për përforcimin e repartit ofensiv – një shumë e konsiderueshme, por ende e pamjaftueshme për të bindur klubin bergamask.

Aktualisht, diferenca prej 10 milionë eurosh është pengesa kryesore që po ndalon finalizimin e marrëveshjes.

Në ndërkohë, ekipe nga Anglia si Manchester United dhe Liverpool kanë shfaqur gjithashtu interes për lojtarin afrikan, gjë që mund ta rrisë edhe më tej çmimin e tij.

Napoli është i vetëdijshëm se nuk është i vetëm në këtë garë dhe do të duhet të veprojë shpejt nëse dëshiron të sigurojë firmën e Lookman./GazetaExpress/