Raportimet e fundit pretendojnë se “gjysma e Premierligës” janë të interesuar ta rikthejnë Scott McTominay nga Napoli, por Partenopei nuk janë të interesuar të humbin fituesin aktual të çmimit MVP të Serie A dhe kanë një çmim astronomik në mendje për të larguar interesimin nga klubet britanike.

McTominay ka ardhur duke u forcuar gjithnjë e më shumë që nga transferimi i tij te Napoli nga Manchester Unitedi verën e kaluar për 30 milionë euro.

Reprezentuesi skocez kontribuoi me 12 gola dhe gjashtë asistime në Serie A sezonin e shkuar, duke ndihmuar Napolin të fitojë Scudetton e dytë në tre vitet e fundit dhe duke marrë çmimin MVP të kampionatit.

Ai ka shtuar edhe katër gola të tjerë në 14 paraqitje për Napolin në fillim të sezonit 2025-26, dhe së fundmi është bërë titull lajmesh me golin e tij spektakolar me gërshërë, i cili ndihmoi Skocinë të sigurojë kualifikimin automatik në Botërorin e ardhshëm.

I ‘diplomuari’ i Manchester United po kthehet shpejt në një nga mesfushorët qendrorë më të besueshëm në Evropë, dhe po tërheq gjithashtu interesimin e shumë klubeve të Premierligës, sipas raportimeve të ndryshme.

“TeamTalk” pretendon se Arsenali, Tottenhami dhe Evertoni janë ndër klubet e interesuara për ta rikthyer McTominay në Premierligë. Madje ka pasur sugjerime se edhe Manchester Unitedi, i penduar, mund të jetë i gatshëm t’i ofrojë 28-vjeçarit një rikthim në “Old Trafford”.

Megjithatë, Napoli nuk ka pothuajse fare interesim ta shesë McTominay në kushtet aktuale dhe, sipas raporteve të “TeamTalk”, nuk do të merrte parasysh as oferta nën 80 milionë euro./GazetaExpress/