Viti 2025 i futbollit italian ka përfunduar duke ofruar spektakël, rivalitet dhe surpriza, si në Serie A, ashtu edhe në Coppa Italia, duke konfirmuar edhe një herë se kampionati italian mbetet ndër më konkurruesit në Evropë.

Napoli është shpallur kampion i Italisë, pas një gare shumë të fortë deri në javët e fundit me Interin. Skuadra napolitane tregoi vazhdimësi dhe forcë mentale përgjatë gjithë sezonit, duke arritur të menaxhojë presionin dhe të sigurojë Scudetton në fund, titulli i radhës që e rikthen klubin në majën e futbollit italian. Performancat vendimtare në ndeshjet kyçe ishin faktori që bënë diferencën në një kampionat të luftuar deri në fund.

Pas Napolit dhe Interit, Atalanta dhe Juventus siguruan pozitat që i dërguan në Ligën e Kampionëve, ndërsa Roma dhe skuadra të tjera u kualifikuan për kompeticionet evropiane. Luftë e fortë u zhvillua edhe në fundin e tabelës, ku Empoli, Venezia dhe Monza nuk arritën të mbijetojnë dhe ranë në Serie B.

Në Coppa Italia, protagoniste ishte Bologna e Vicenzo Italianos e cila realizoi një sukses historik duke fituar trofeun pas më shumë se pesë dekadash pritje. Në finalen e luajtur në “Stadio Olimpico” në Romë, Bologna mposhti  Milanin me rezultatin minimal 1–0, në një ndeshje të luftuar, ku vendosi një gol vendimtar në pjesën e dytë. Ky triumf i siguroi klubit jo vetëm trofeun prestigjioz, por edhe pjesëmarrjen në Europa League sezonin e ardhshëm.

Viti 2025 do të mbahet mend për rivalitetin e fortë për titullin kampion, rikthimin e Napolit si forcë dominuese dhe suksesin e Bolognës, që i dha një dimension të veçantë këtij edicioni. Me emocione deri në fund dhe histori të reja të shkruara, futbolli italian konfirmoi edhe një herë se mbetet një nga skenat më interesante të futbollit evropian. /GazetaExpress