Napoli ka lëshuar një deklaratë zyrtare ku konfirmon se beson që Stadio Diego Armando Maradona nuk është i përshtatshëm për punimet e planifikuara të rindërtimit, duke shprehur synimin për të ndërtuar një arenë të re për të pritur ndeshjet e EURO 2032.

Çështja e stadiumeve në Itali vazhdon të mbetet një problem i madh, veçanërisht përballë afateve për sigurimin e pesë stadiumeve për turneun EURO 2032, i cili do të organizohet bashkë me Turqinë. Të dy vendet do të duhet të sigurojnë nga pesë stadiume, por edhe kjo duket sfiduese në Itali.

Këshilli lokal në Napoli kishte propozuar një projekt për rikonstruksionin e stadiumit ekzistues Maradona. Mbi këtë temë u zhvillua një takim me përfaqësues të UEFA-s, FIGC-së, autoriteteve lokale dhe klubit Napoli.

Megjithatë, Napoli publikoi sot një deklaratë ku paralajmëron se takimi nuk solli asnjë vendim konkret dhe, në fakt, i përforcoi bindjet e klubit se “Stadio Maradona nuk është i përshtatshëm për të pritur EURO 2032.”

Klubi gjithashtu mohoi raportimet se UEFA kishte dhënë miratimin për këtë stadium si një arenë pritëse për turneun.

“Pas dy vitesh studimesh të financuara nga klubi, kemi përjashtuar mundësinë e investimeve të arsyeshme në stadiumin Maradona. Edhe ndërhyrjet e propozuara nga Këshilli, të cilat janë të papërshtatshme, nuk do ta çonin stadiumin në standardet e një arene moderne,” thuhej në deklaratë.

“Napoli synon të investojë burimet e veta për ndërtimin e një stadiumi të ri, i cili do të jetë i gatshëm të presë edhe ndeshje të EURO 2032.”

Klubi ka identifikuar një zonë të degraduar të qytetit, ku ndërtimi i stadiumit të ri do të sillte një kontribut të rëndësishëm për rigjenerimin urban – pa kosto për qytetin./GazetaExpress/