NASA mund të shtyjë misionin e saj për të dërguar astronautë në Hënë për herë të parë pas më shumë se gjysmë shekulli, pasi zbuloi një defekt në raketën e saj.

Artemis II ishte planifikuar të nisej nga Kennedy Space Center në Florida që në fillim të marsit.

Megjithatë, të premten në mbrëmje, NASA zbuloi se rrjedha e heliumit – e nevojshme për nisjen – drejt raketës ishte ndërprerë gjatë një faze kyçe të procesit të përgatitjes, raporton Sky News.

Një zëdhënës i NASA-s tha: “Kjo pothuajse me siguri do të ndikojë në dritaren e nisjes në mars.”

Para këtij pengimi, agjencia kishte njoftuar se synonte datën 6 mars për të nisur katër astronautë rreth Hënës dhe për t’i kthyer ata në Tokë.

Ekuipazhi përfshin tre astronautë amerikanë – Reid Wiseman, Victor Glover dhe Christina Koch – si dhe kanadezin Jeremy Hansen.

Ata do të bëheshin astronautët e parë që fluturojnë drejt Hënës që nga Apollo 17 në vitin 1972 dhe do të realizonin fluturimin njerëzor më të largët në hapësirë ndonjëherë.

Nuk ka plane që misioni të zbresë në sipërfaqen e saj.

Artemis II është një pararendës i planit të NASA-s për uljen e astronautëve në Hënë me Artemis III, i planifikuar për vitin 2028.

Misionet Artemis janë pjesë e planeve afatgjata të NASA-s për të ndërtuar një stacion hapësinor – të quajtur Lunar Gateway – ku astronautët do të mund të jetojnë dhe të punojnë, si dhe të përgatiten për misione drejt Marsit.

Një provë e parë për nisjen, më herët këtë muaj, u ndërpre pasi u zbulua një rrjedhje hidrogjeni.

Por një test i dytë u përfundua të enjten pa u identifikuar rrjedhje, pasi teknikët zëvendësuan dy vula, gjë që drejtori i nisjes, Charlie Blackwell-Thompson, e përshkroi si “një hap të madh për të fituar të drejtën për të fluturuar”.

Kur misioni 10-ditor të mund të realizohet, ekuipazhi do të testojë sistemet e mbështetjes së jetës, navigimit dhe komunikimit për të konfirmuar se gjithçka funksionon siç duhet në hapësirën e thellë.

Kapsula më pas do të hyjë në orbitën e lartë të Tokës, ku ekuipazhi do të drejtojë manualisht Orionin përpara se kontrolli t’u kthehet qendrave të kontrollit në Qendrën Hapësinore Johnson të NASA-s në Houston, Teksas.

Astronautët më pas do të kalojnë katër ditë duke rrethuar Hënën, duke udhëtuar rreth 4,600 milje përtej anës së saj të largët, përpara se të kthehen në Tokë dhe të bien në Oqeanin Paqësor.