Në Katar futbolli është gati të rifillojë.

Pas ditëve të tensionit në rajon dhe ndërprerjes së përkohshme të aktiviteteve sportive, garat kombëtare pritet të nisin sërish gjatë kësaj jave, duke filluar nga Qatar Stars League (QSL).

Sipas programit të ri, të enjten janë në program tri ndeshje, ndërsa klubet i kanë rinisur tashmë stërvitjet për t’u përgatitur për rikthimin në fushë.

Në të njëjtën kohë janë marrë edhe masa shtesë sigurie për shkak të situatës së tensionuar në rajon.

Rifillimi i kampionatit është një sinjal i rëndësishëm edhe për ngjarjet ndërkombëtare që pritet të zhvillohen në Doha.

Në veçanti, bëhet fjalë për Finalissima, sfidën mes fituesit të Evropianit dhe atij të Copa América, Spanjë - Argjentinë.

Pavarësisht se në ditët e fundit janë diskutuar alternativa të ndryshme për zhvendosjen e saj, CONMEBOL dhe UEFA e kanë konfirmuar Dohën si vendin përfundimtar të zhvillimit të ndeshjes.

Për këtë arsye, rikthimi i aktiviteteve sportive në Katar shihet si një hap i rëndësishëm për ta garantuar zhvillimin normal të kompeticioneve dhe për ta ruajtur planifikimin e eventeve të mëdha ndërkombëtare që pritet të mbahen në vend. /Gazeta Express