Presidenti i SHBA-së, Donald Trump, po “krijon kushtet” që mund të çojnë në një “marrëveshje të mirë” me Iranin, thotë kryeministri izraelit, Benjamin Netanyahu, por ai ende mban rezervat e tij.
Netanyahu, i cili u takua me Trump në Shtëpinë e Bardhë të mërkurën, tha se ai shprehu përgjithësisht “skepticizmin” e tij dhe theksoi se nëse arrihet një marrëveshje më në fund “ajo duhet të përfshijë elementë që konsiderohen shumë të rëndësishëm për Izraelin”, siç janë përfundimi i programit bërthamor të Teheranit, kufizimet në raketat e tij balistike dhe mbështetja e tij për grupet e armatosura si Hezbollahu i Libanit, Hamasi në Gaza dhe Huthi në Jemen.
“Kushtet që po krijon Trump, të kombinuara me faktin se iranianët sigurisht e kuptojnë se bënë një gabim herën e fundit, kur nuk arritën një marrëveshje, mund të lejojnë krijimin e kushteve për arritjen e një marrëveshjeje të mirë”, tha Netanyahu para se të largohej nga Uashingtoni.
Takimi i Trump me Netanyahun dje u zhvillua me dyer të mbyllura dhe zgjati dy orë e gjysmë. Presidenti amerikan e përshkroi atë si “shumë të mirë”, por theksoi se nuk u morën vendime të mëdha.
“Ne kemi një marrëdhënie shumë të ngushtë, të sinqertë dhe të hapur”, tha Netanyahu, duke vënë në dukje se diskutimi u përqendrua në shumë çështje, por kryesisht në negociatat me Iranin dhe se Trump donte “të dëgjonte pikëpamjen e tij”.
“Presidenti beson se iranianët e kanë mësuar tashmë se me kë kanë të bëjnë”, tha ai. /Panorama
